مواضيع جديدة

السبت، 23 أبريل 2011

الشعب يريد مصطفى محمد


انا من زمان اوى جدا خالص ... مدخلتش المدونة .. يعنى من ايام حسنى مبارك .... خاصة انى فى اخر موضوع ليا.. لازك لحسنى وبعده بكام يوم قامت الثورة ... ومقعدتش الا لما خلعتة .. فانا ايام الثورة بصراحة خالص .. مكنتش فى ميدان التحرير ... بس كنت لازق فى ميدان المحافظة فى المنصورة ... احنا الناس اللى كانت مهضومة حقها فى الاعلام .. والجزيرة مجتلناش الا مرتين كدة.
بعد الثورة بقى .. كان الواحد عندة كمية كلام نفسة يطلعة من اعماق قلبة ... سواء عن الفرحة اللى حصلت وانا واقف مكنتش مصدق نفسى .. والجنان اللى حصلى ساعتها وانا واقف بين الناس ... فكانت تعتبر اكبر فرحة حصلت فى حياتى ..حتى والله كانت اكتر من فرحة نجاحى فى الثانوية العامة او التخرج .. والخلع من الجيش ... والصراحة مطلوبة جدا الوقتى ... انا بقى ... فضلت متنح حوالى كام اسبوع عامل زى الواحد اللى كان واقف فى أمانة الله .. وواحد ضربة بعصاية امن مركزى فضل واقف متنح .
ولما بدأت افوق شوية بشوية من الغيبوبة ... قلت بقى اكتب بقى واطلع كل اللى جوايا ... المستخبى والمستنيل على عينة.. فبدأت فى موضوع ... لقيت موضوع تانى دخل فية ... وهكذا ... فمكنتش بكمل موضوع على بعضة ... فحسيت ان الثورة كانت كبيرة اوى عليا لدرجة انى مش عارف اكتب فيها حاجة.
وفاتت أيام وليالى وبعدين قلت اكتب عل الفيس بوك .. وفعلا كتبت على الفيس بوك موضوع كامل والحمد لله ... وبدأت استعيد عافيتى ودخلت المدونة تانى علشان اكتب ... وادخل الاقى لوحة التحاكم اتبعترت والحاج جوجل احتفل بالثورة .. وغير نظام تحكم المدونة من جوة.
لا وبدور فى المواضيع الجديدة لقيت شيماء " الشعب لابد له من حكومة تشكمة" رجعت للكتابة مرة تانية فى المدونة بتاعتها بعد انقطاع ظل عام متواصل عن اجتماعات المدونين .. والمدونة ...لتتخلى عن رأيها الاول .. وتعمل موضوع اسمة مبقاش فية حكومة تشكم الشعب... والواحد يبعد كام شهر يرجع يلاقى الدنيا اتغيرت واتبهدلت كمان.
بس برضة انا ليا حق اتصدم ياجماعة ... واحد طول عمرة ميعرفش غير تلاتة .. ابوة وامة ومبارك .. واحد يروح فجأة كدة ويدخل السجن كمان ... لسة بنحاول نستاوعب ... وكمان انا افتكرت موضوع انا كنت كاتبة قبل كدة فى هذا الحلم ... وكان أسمة "لمؤخذا انا مصرى" ... وكمية الردود عليها اليائسة مثلى ... ثم بعد حوالى عام وبضع شهور .. يتحقق هذا الحلم ... بل أزدادت الحقيقة عن الحلم الكثير والكثير.
معلش بقى انا رغيت كتير اوى .. ودى مش طبيعتى اساسا ... ويعتبر انى انا أخر واحد اتكلمت عن الثورة ... بس انا حبيت استعيد معاكم هذه الذكريات التى لا تنسى.
معلش نسيت أقولكم ... فى مجموعة من البشر عاملين مظاهرة علشان يرجعوا الرئيس تانى يوم 25 ابريل ... هو صحيح انة ممكن يحكمنا من سجن طرة ... بس مش مشكلة ... بس الراجل دة لازم يرجع ويبقى رئيس ... استنى بس من غير ما تشتم ... السبب ياجماعة .. ان المظاهرات بعد مبارك معدش ليها طعم ... الواحد بقى بيطلع يقولة كلمتين ويرجع ينام فى بيتهم ... فين ايام الغاز المسيل للدموع ... ولا الرصاص المطاطى ... ولا البلطجية والملتوف ... فين ايام الثورة الاكشن ... كان فية اثارة وتشويق .. كان الواحد حاسس انة أحمد السقا فى فيلم "الرصاصة مازلت فى بطنى" .. مش الثورة بتاعة اليومين دول ... تحس كدة انها ثورة رومانسية.


ترتيبى