تخاريف ما بعد الأمتحانات

سنه من التدوين

لم اكن فى يوم من الايام احلم بأن اكتب شئ أو يقرأ لى احد اى كلمات ..لان الكتابة لم تكن من اولوياتى ..وانما لم اكتشف ذلك الا فى الكلية ..ففى أمتحاناتى" خاصة النظري منها " كنت يجب ان اقوم بتأليف الكثير من الاجابات فى الامتحانات ..وكنت اعاهد ذلك تمام ان عندما اقوم بالتأليف فى مادة (اجيب تقدير) فيها ..والمادة الذى لا اقوم بالتأليف فيها تكون مقبول دائما ..الى ان جأنى مادة تسمى المراجعة وجأت الى الفرصة فى التأليف فكان يطلب جزء من سيناريوا بين طالب كلية التجارة وابية وهم يتحدثان عن ما يأخذة فى الكلية فى هذة المادة ..وهنا كتبت سيناريو لم يستطيع احد كتابتة ..فقد كتبت فى وسط الكلام

يوسف :اريد بعض من الشاى يا امى...

الام:حاضر ياحبيبى

وبعد ان انتهى الامتحان قلت لاصدقائى عن ما كتبت فكان الكل يقول على الدنيا السلام فى هذة المادة ..فالكل متوقع بأننى سوف اسقط فى هذة المادة .. الا ان التوقعات كلها تبدلت فقد اتيت بتقدير فى هذه المادة..ومن هنا بدأت الحكاية فى عالم التدوين ..فعندما وجدت هذة الموهبة المدفونة فى ترب اللى بعد السكه الحديد .. قررت ان ابدأ فى الكتابة ..بل ويجب ان يقرأوا ليا الناس حتى اقوم برش البيض الناشف عليهم ... بل تعجبت عندما وجدت ان هناك من يقرأ لى ويقرأ موضوعات لى .

مر عام من التدوين ووجع دماغكم .. ولذلك قررت قرار ومْصر على هذا القرار اصرارا والحاحا .. وهو أن اتنحى ... قصدى " ان اكون كاتم على نفسكم فى هذة المدونة ".. وكل عام والمدونة بخير .

معرض الكتاب وناس زى العسل

مش عارف ياجماعه المدونة لما تكبر قدامك كدة ويبقى عندها سنة وكام يوم .. يعنى زمانها بتمشى الوقتى .. احساس الاب وابنة اللى مطلع عينة ابوه. هو نفس احساس السمكة بعد ماتتاكل .. احساس الجحش لما يكون بيستحمى فى بطن امه.

أمبارح كنت فى معرض الكتاب... كنت رايح مخصوص علشان أشوف الناس الحوة والناس اللى زى العسل .. علشان حفل توقيع استاذتى "سحر غريب " فى كتابها الرائع " تعيش وتاخد غيرها " وبقولها كل كتاب وانتى طيبة يا سحر .. ورفيق دربى وعمرى اللى لسة شايفة امبارح"أحمد الصباغ" اللى بجد انا بحبة من قبل ما اشوفة .. ولما شوفتة حبيتة اكتر ..وكتاب الممتع " الضرب فى الميت " .. يعنى الكتابين قشطة اوى واحد هيعيش وباخد غيرها والتانى هيموت وهيضرب

دا غير طبعا شيخنا الشيخ بلال فضل .. بجد الراجل دة رائع رائع بجد يعنى .. وشخصية محترمة جدا جدا .. مش عارف بس الساخرين حاسس ان كلهم كدة شبة بعض وشخصيات كلها جميلة وحبوبة دايما.. ودايما دمها خفيف.

بالنسبة لحبيبنا واصحابنا .. فانا قبلت مدونين كتير منهم من قابلتهم من قبل ومنهم من لم اقبلهم من قبل.. طبعا قبلت حبيب قلبى وابن بلدى " اشرف توفيق" وصديق دربى على الانترنت استاذ " مصطفى ريان " .. و"ماجد ابراهيم".. و" محمد مهنى".. وابراهيم اطاطا.. مين ابراهيم اطاطا دة .

وأصحاب العناء الموصلاتى .. بسمة عبدالباسط و ضحى حلمى وحسام اخو ضحى و سارة الاسكافى واسلام جاويش وأسماء حجازى وبسمه مسلم .

بالنسبة للأمتحانات .. نتوجة الى اذاعة خارجية

بسم الله الرحمن الرحيم .. نحن هنا من ارض الكنانة العربية نوجة لكم افضل تحية على كل المدونتى ونقول لكم بأن عباس مازال بخير .. وأن امتحاناته السته كلهم تمام اوى ماعدا ست مواد منهم فقط .. والباقى كله بخير- على اساس ان فى باقى – وانه كان يدون فى الامتحان كل ما يفتكر شئ .. فاصبحت ورقة اجابة الامتحانات مدونه .. لما كان يذاكره طوال الليل اما التلفاز .. بين ميلودى للأفلام وروتانا سينما .. ويرسل لكم تحية كبيرة جدا – من ام 2 جنية – لكل من فى كفر المدونين والاحياء الشعبية المجاورة وخاصة الفيس بوك .. ويرسل تحية لبسطويسى ومصيلحى وزقزوق وخميس وجمعة وسبت وباقى ايام الاسبوع

كان معكم

حد ابوالعافيه

موفد قطاع النجار - الكمبيوتر

من الواضح انى بقيت بالْكِ – بتكلم كتير يعنى – قد يكون اخراج لكبت شهر كامل لم اكتب شئ .. يالا تصبحوا على كوباية مايه

هذا البوست برعاية " زنقة كولا" .. راعى الجزمة المصرية فى المدونة