الرجالة عقلهم كبيييييييييييير
تصدق بجد كدة..الموضوع دة اكتشفتة لسة قريب..ان الرجالة عقلهم كبير..انا مش بقول الكلام علشان اعمل فتنة نسوانجية ولا حاجة والله
بس بجد الرجالة عقلهم كبير..رغم انى مقتنع ان فى نساء كتير عقلهم بمية راجل(يعنى حوالى طن ونص) بس انا قولت اجيب التاريخ من الاول كدة لقيت ان الراجل متساوى مع الست فى كل حاجة ..وان مفيش تفرقة بينهم ..بس فى شوية مشاكل كدة حرمت البنات من شوية حاجات ..زى التعليم وغيرة..بس الحمد لله الرجالة سعت لانها ترجع للستات حقها ..واول واحد هو رفاعة الطهطاوى..لما رجع من برة ..طالب بتعليم المرأة
وانها متساوية مع الراجل فى التعليم
لكن جات على دماغنا احنا ..وبنعيط الوقتى بدل الدموع دم ..علشان هما اتعلموا ...اتعلموا علشان يتفتحوا كدة ويبقوا تمام ...ازدادوا جهلا اكثر..
المهم..البنات بقت بتتعلم زى الولد ..علشان تطلع منهم واحدة ممرضة وطبيبة ..وحاجة تفرح كدة تنفع المجتمع
فعلا طلع منهم ناس كدة ونفعوا المجتمع لكن فى المقابل
طلع ناس جاهلة كتير ..ودى سبب مشاكلنا الوقتى
بدأوا الستات يجتمعوا مع بعض(ويعنى على الستات بقى لما يجتمعوا مع بعض )وعملوا المجلس القومى للمرأة والمجلس النسوى..كل دة علشان يطالبوا بحقوق مش بتاعتهم ..اصلا
وكل دة والرجالة ساكتة ومبتقولش حاجة..راحوا فى ثورة 1919وقلعوا هدومهم علشان يبقوا زى الراجل..اشمعنى الراجل يعنى ماشى قالع راسة ..احنا كمان لازم نقلع راسنا..مساواة برضة
بعد كدة عملوا منظمات ودنيا وبدأوا يطالبوا بحقهم فى كل حاجة الراجل بياخددها ..يعنى مثلا ..الراجل بيشتغل يبقى البنت لازم تشتغل .حتى لو هتقصر فى بيتها وتربية ولا دها المهم تبقى زى الراجل وبس..الراجل بياخد ضعف الميراث ..لا ازاى البنت لازم تاخد زية متاخدش نصة ..الراجل ميتجوزش اكتر من واحدة ..دا انا سمعت واحدة بتقول لشيخ هو الراجل بيتجوز اربعة ..اشمعنى البنت متتجوزش اربعة ...((لا تعليق))
الستات خدوا حقوقهم واكتر من حقوقهم ولسة بيطلبوا حقوق كمان ...وهيفضلوا يطلبوا حقوق..والموضوع دة طبعا لانهم عندهم نقص ..فى شخصيتهم..والنقص دة عمرة ما هيروح هيفضل موجود عندهم على طول ..لانهم بقوا زى الراجل فى كل حاجة الا فى حاجة واحدة بس وهى ان عقلهم مش كبير زى الرجالة ...الرجالة مكبرين دماغمهم ..من التفهات دى..دا الحق يقال ..ان الراجل هو اللى مفروض يطالب بحقوقة دلوقتى..حقوقة اللى مسلوبة منة
بس احنا علشان عقلنا كبير ..مبنبصش للكلام الفاضى دة
ونفسنا كل ست يبقى عقلها كبير.
.jpg)
18 فكوا معايا:
الستات ناقصات عقل ودين ونفهم الكلام ده صح العيب مش فى الرجل اللى طلع الستات تتعلم ولا فتح لها طريق للتحرير والتنور الاسلام اصلا جه علشان يكرم المراة ويحررها من العبودية والذل ولو كل واحدةعرفت الاسلام صح هيكون عقلها كبير اوى وقلبها كمان
لكن مين اذكى من مين ومين بيفهم اكتر من مين دى حالات فردية وبتختلف والعلم اثبت ان الرجال بيتفوقوا دايما فى مجالات العلوم والستات فى المجالات اللغوية اكتر بس مش شرط ظهر ستات علمات واذكياء جدا زى سميرة موسى وغيرها
ايوشة
نورتى التوبيك..وانتى عندك حق ان لو كل واحدة عرفت الدين بتاعها صح..هتبقى عاقلة جدا وحرة جدا..وفى اقصى السعادة
اما بالسبة لناقصات عقل ودين..فمعنى ناقصات عقل ..اى يقدمون العاطفة على العقل..ودى حقيقة..ودى مش عيب..ال انها قد تكون ميزة للبنت..
ربنا يهدينا ويهدى كل المسلمين والمسلمات الى طريق الخير
مش ها اعلق يا خويا
انا عقلي نونو لا يُرى بالعين المجردة
يحتاج الى ميكرسكوب وبالألترا فيلوت لايت علشان يتشاف
معلش معلش
المهم انك مكبر
العجيب في الأمر حاجتين
أولهما إنك ذكرت كل شاذ زي الست اللي عاوزة تعدد
ثانيهما أنه لا يوجد راجل فالح رباه راجل
من غير امه يطلع اهبل وعبيط ومريض نفسياوالتاريخ يشهد
لكن مش ده العجيب
العجيب أنه لما يكبر يزعل قوي لو قال أنا تربية ست
انا بقى افتخر
انا تربية ست ربنا يبارك لي في عمرها
بميت راجل من "كبار" النفوخ
اللي ليه حق لازم يطالب به طالما يوافق الشرع
واللي يخاااااااف يطلع بره
ويكبر برضه
بس مش عقله
تحياتي
إنت إيه اللي خلاك تدخل المنطقة المحرمة دولياً دي؟
ههههههههههههههههههههه
مقرتيش يافطة ممكنوع الإقتراب والتصوير؟
ربنا معاااااااااك
ههههههههههه
أنا معرفكش
ولا كأني جيت هنا
ههههههههههههههههههههه
رغم صحة الكلام اللي انت قلته
وده طبعاً لأنه طبيعة النساء
هم بيطالبوا بالتساوي مع الرجل
رغم تنهم في الاصل مش أقل منه في حاجه
على رأيك الرجاله الوقتي هم المفرود اللي يطالبوا بحقوقهم
تحياتي على الموضوع
ستيته حسب الله الحمش
مين اللى قال كدة بقى
دا انتى ستيتا كلنا..واللر يقول كدة يبقى عقلة صغير.
بس انا مذكرتش شاذ..انا بقول الست اللى عايزة تلغى التعدد من المجتمع كلة ..يعنى تلغى كلام النبى صلى الله علية وسلم
اة فعلا..وراء كل رجل عظيم أمرأة ..وانا موافق على كدة ..بس لما يبقى المرأة مش وراة..وعايزة تبقى هى الحاصلة عظيمة ..
انا لم انكر فضل المرأة على المجتمع ..ولا قلت ان كل امرأة عقلها صغير..انا بنتكلم عن المرأة اللى عايزة تغير حاجات فى الدين علشان مصلحتها هى
نورتى التوبيك ياستيتة
د. ياسر عمر عبد الفتاح
هههههههههههه
بقى كدة يا دكتور تبعنى فى اول مطب ..
على العموم انت جيت...واللى كان كان
نورت
محمد عبدالرحمن شحاتة
اهو انت قولت يا محمد..متيجى نعمل اضراب جماعى ضدهم..
هنبقى نتفق على الاضراب مع بعض
نورت التوبيك يامحمد
انت على رأي د ياسر دخلت فى المنطقة المحرمة دوليا
هههههههههههههههه
الأنثلة العجيبة اللى انت قلتها لمطالب مخالفة للفطرة السليمة والدين دي معاك حق فيها.
الميراث والتعدد للست دة مش هتكلم فيهم لكن الشغل والعلم هتكلم بقى.. اصل ديننا حثنا عليهم سواء كنا رجالة أو ستات.. العلم علشان يكون عقلها واعي والشغل لو بتحبه وتقدر عليه علشان متحسش بالفراغ العقلي.. ودى حاجة مهمة قوى للست علشان متفضاش بقى للمشاكل وتقعد تقرف الراجل فى عيشته.
وبعدين على فكرة الرجالة اللى بجد فعلا عقلهم كبير ويقدروا يحتوا الست لأن الست مشاعرها متقلبة دايما وتحتاج عقل وقلب كبير يحتويها.
اول معرفت انك من المنصوره قولت ابن بلدى وادخل اشوفه واول زياره ليا الاقيك بتقول كده.؟؟؟
وطول البوست عماله اقول بس اخلصه وارد عليك وافضالك روحت انت باه لاحق نفسك باخر سطر ان ده للى عقلهم الصغير...:))
بتثبتنا يعنى,, مااااااااشى علشان منتناقش فنبأه من اصحاب العقول الصغننه ماااشى مااشى...:)
عموما هقولك حاجه سيبك من الجماعه بتوع الجمعيات والحجات دى مش بحب اتكلم عنهم اصلهم فاضيين اوى..وسعات بيقولوا حجات ممكن تجيبلى شوجر او تكور فى المخيخ من كتر الهبل اللى بيقولوه.
لكن مش من حقك انك تقول ان المراه لما اتعلمت ازدادت جهلا انا اصلا مش فاهمه الجمله دى...؟؟؟؟
وعلى فكره اسلامنا ادانا حقوق منصفه جدااا ومساويه الا من بعض الاشياء مع الرجل وان لم تطبق فالعيب فينا احنا..
يعنى هقولك الاسلام قال ان المراه ليها ذمه ماليه منفصله عن جوزها..الاسلام قال ان المهر من حقى انى اخده كاااش مونى هو والمؤخرواخد بالك انت واحطه فى جيبى ولا اساعدك فى عفش لا ده ملكى وبس..
دا غير الحق فى التعليم وحتى فى الجهاد الاسلام اعطى للمراه الحق فى ده كمان..
كون ان فى ستات باه عندها ربع ضارب وتطلع تقول حجات عجيبه ياسيدى اعمل نفسك مطنش اومال ربنا خلقلنا اتنين ودن ليه واحده يدخل منها الكلام والتانيه يخرج منها...
وبعدين يعنى انا كمان ممكن اطلعلك رجاله نص كم وجمعيات عجيبه للرجاله بتطالب بحجات هسهس .فى جمعيه اسمها جمعيه سى اليد اباه اتفرج عليها هتتبسط اوى ومش بعيد تتكسف انك راجل اصلا ههههه
سيبك من الناس دى وخليك فى النورمال دول ستات اب نورمال..:)
السلام عليكم و رحمة الله و بركاته
أنت فعلا عندك حق فى النقطة دى "فعلا طلع منهم ناس كدة ونفعوا المجتمع لكن فى المقابل طلع ناس جاهلة كتير .."
بس دا بالتطبيق على الرجال و النساء معا
مش حد و حد لا
الرك أولا و أخيرا على فكر الشخص و اقتناعه و قناعاته
وهل هو بينظر للامور بمنظور دينى كما أمره الله
ولا بيبص للامور من منظور بشرى شخصى
أعتقد ان دا اللى بيفرق
دمت بود
اولا بعتذر جدا جدا عن التاخير في التعليق للمره التانيه
ثانيا بالنسبه للموضوع فعلا انا معاك في الراي فعلا الايام دي مفيش ورانا غير المطالبه بحقوق المراه وعمل جمعيات للمراه والكلام الفاضي ده وماخفي كان اعظم
بس انا من وجهة نظري ان المراه نصف المجتمع وربنا سبحانه وتعالى خلق ادم وحواء مش ادم بس وكل واحد ليه دور مهم في المجتمع ومفيش مجتمع خالي من المراه ومفيش مجتمع خالي من الرجل يعني كلاهما مكملان لبعضهما
بس بصراحه اللي بيحصل الايام دي زايد اووي يعني البعض من النساء عايزين المراه هي كل المجتمع وبقى في متشبهين بالرجال كتير
يعني انا من وجهة نظري ان المراه لها دور مهم واساسي في المجتمع وفي اغلب المجالات
بس لازم تكون متمسكه بدينها اولا بالاضافه ان في حاجات ربنا جعلها من اختصاص المراه وحاجات اخرى من اختصاص الرجل يعني مينفعش المراه تتدخل في كل حاجه بدافع المساواه وخلاص
وزي مافي رجال ناجحين في مجالات متعدده في نساء ايضا ناجحين في مجالات متعدده
وزي مافي نساء عقلهم صغير في رجال برضه عقلهم صغير
يعني خلاصة القول ان المراه والرجل مكملان لبعضهما في المجتمع
كفايه كده
على فكره انا طول منا بقرا الموضوع وانت عمال تتكلم على النساء قلت دى انت نهارك ابيض معايا في التعليق
بس طلعت ذكي ولحقت نفسك في الاخر
يللا بقى هعديها المره دي
وعلى فكره من علامات الساعه كثره عدد النساء وقلة عدد الرجال
يعني خللي بالك
تقبل خالص تحياتي
بص
هقولك
كل مقدر لما خلق له
أكيد
النساء ليها دور فى الحياة زى رعاية البيت والتربية وادوار الرعاية وكده
اما الرجالة
فهما اصحاب المهام الصعبة
والشغل والقيادة وكده
بتغاظ اوى من مواضيع حقوق المراة وكده
رغم انهم خدوا معظم حقوقهم
بالنسبة لعنوانك
أويده بشدة
MaNoOoSh
انا معترضتش على الشغل والا العلم.
وقولت العلم علشان تبقى حاجة تنفع المجتمع بس ميبقاش على الوظيفة الاساسية بتاعة ..الاهى رعاية زوجها وولادها..
ونورتينا بتعليقك الجميل
الشعب لابد له من حكومه تشكمه
اهلا ببنت بلدى الاول..نورتى المدونة
وكلامك كلة على عينى وعلى راسى...
انا معترضتش على المرآة..ولكن كل اعتراضى عن الناس اللى بتخرف بس
وبالنسبة لجمعيات الرجالة ..على الاقل محدش يسمع عنها..فانا اول مرة اسمع عنها منك...اما الستات واضحين فى كل حتة ..وكل شوية عاملين هيصة فى حتة
تحياتى
Soul.o0o.Whisper
وعليكم السلام ورحمة الله وبركاتة
ازيك ياسول
انا معترضتش على ان فى رجالة دماغها ضاربة برضة...بس لما الواحد يبقى دماغة ضاربة لوحدة..مفيش منة خوف
اما لما تبقى جمعية كاملة دماغها ضاربة..بنخاف لتضرب الباقين
وربنا يستر
sara mohammed
اخبارك اية ياسارة.
ادم وحواء خلقوا..ولكل وظيفة معينة..
فانا بعتبر انا احنا فى مسرحية ..وكل واحد خد دور التانى ..وباظت المسرحية
لو كل واحد عرف حقوقة وواجباتة..الحياة هتمشى تمام اوى
تحياتى
د/عرفه
نورت المدونة يادكتور
هما مخدوش خقوقهم بس يادكتور ..دا خدوا حقهم كلة..وحق الناس اللى عايشة معاهم ...ولسة بيطالبوا كمان
تحياتى لك
إرسال تعليق