سنة ورا سنة

فى هذا العام ونحن نودعها اذكر فيها الكثير والكثير

فعلى المستوى الشخصى .. هذا العام كان بالنسبة لى فيها نجاح لى .. لا يقارن بالسنين اللى قبلة

فى 30 يناير 2009 .. عملت اول تدوينة على مدونة فك زنقة وكانت فتحة خير عليا

فى 5 فبراير 2009 عملت اول جروب على الفيس بوك وهو كان جروب حملة ماشى للطريق الصح .. وكانت للسعى للأرتقاء بالذات والنجاح والسعادة فى الدنيا والاخرة

فى 30 مارس 2009 أفتتحت مدونة ظبط نفسك للتنمية البشرية .. وربنا يسهل واكمل فيها

فى 3مايو 2009 اشتركت فى مهرجان الاسر على مستوى جامعة المنصورة .. والحمد لله كان فى اقبال كبير على اعمالى فى المعرض.

فى 14 مايو 2009 اول ظهور ليا فى جريدة العالم اليوم عندما كتبت اسماء رمضان عن مدونة ظبط نفسك

فى 4 اغسطس 2009 النتيجة ظهرت واوعى حد يسأل عن التقدير لان حرام .. انا نجحت والحمد لله

فى 28 اغسطس 2009 انشاء مبادرة "خلى مدونتك كتاب"

فى 2 سبتمبر 2009 عمل اول كتاب الكترونى خاص بى وهو كتاب "سوسة مصر"

فى 5 اكتوبر 2009 انشاء مجلة شخبطة الالكترونية وكان اول عدد فى 5 نوفمبر

فى 22 أكتوبر 2009 ثانى ظهور ليا وبعد غياب فى حوار خاص جدا –على اساس انى البردعى- مع اسماء رمضان فى المدونخانة

فى 2 نوفمبر 2009 تم ترشيحى كأمين سر النادى الادبى بكلية التجارة جامعة المنصورة

فى 18 نوفمبر 2009 نشر موضوع "فى عصر الست لما " فى جريدة الجيل

فى 7 ديسمبر 2009 كنت بتغدى

فى 31ديسمبر 2009 كنت بكتب الكلام الفاضى دى

على المستوى العام

الحمد لله .. محصلش السنة دى اى حاجة وحشة .. الحياة كان لونها بمبى جدا جدا هو يعنى حرب غزة فى اول السنة بس الحمد لله .. ويعنى مفيش غير قطرين دخلوا فى بعض بس السنة دى .. والزبالة بقت تمام اوى ..بقت كيس على كل مواطن .. يعنى هو حصل حكاية مصر والجزائر بس لما ولعوا فى بعض .. وبعدين مفيش مشكلة لما اوباما جة مصر وسنج الشعب المصرى .. وخد نوبل فى التسنيج .. فى النهاية عملنا جدار فولازى –طيب كلوا الاول وبعدين دوروا على الجدار – علشان نقفل السدود اللى قرفانة دى اصل عايزين يدخلولنا مخدرات .. وحافاظا على اروح الشعب .. علشان ميتسِطلش - دا على اساس انة مكانش مسطول – طبعا الجوانب الرئيسة بتاعة كل سنة لسة موجودة .. يعنى الفقر ذاد وحوادث الطرق واللى يتكلم يتحبس والكلام دة

بارقة امل : محمد البردعى ابدى استعدادة لدخول الرئاسة فى 2011 .. ربنا يستر علية يارب وميروحش فى الرجلين .. هى الصحف القومية ماسبتوش فى حالة دا بس علشان لسة برة .. لما هيجى بقى هيعملوا اية بقى .

فى 2010

الحمد لله السنة دى خدنا فيها صفرين .. زى ما مكتوب فيها بالظبط .

الصفر الاول : لما مفيش ولا واحد رشح مصر لاستضافة كاس العالم ..وخدنا صفر

ولصفر التانى : فى التصفيات وفى اخر ماتش مع الجزائر خدنا صفر

دا لسة من قبلها .. ربنا يستر على السنة بقى

وكما قال الشاعر اشرف توفيق

طول عمرنا نكتم جراحنا فى قلبنا فى اخر السنة

ونكتب على وش النتيجة " عام سعبد"

احتمال كبير اغيب عن المدونة يجى شهر كدة علشان المذاكر بقى .. ولا مذاكرش واقعدلكوا واسقط ... وبعدين الناس اللى انا مردتش عليهم من ايام الفراعنة .. يستحملونى لانى بجد عايز افوق شوية .. وان شاء الله الناس اللى معندهاش امتحانات تظبطلنا لقاء حلو كدة فى معرض الكتاب مدونين مصر .. بس بشرط انة يكون بعد يوم 4فبراير ... على ما اخلص امتحانات

المدونة غير التصميم بتاعها علشان الجماعة اللى مش عارفين يردوا .. وانا على العموم هبقى اتابع كدة من تحت لتحت .. زى قبل كدة يعنى هبقى اخة خلسة من وراكوا واتابع مدونتكوا .. علشان لو فى حد جاب فى سيرتى كدة ولا حاجة واستغل انى مش موجود .

يالا بقى لانى صدعتكم ..

لمؤخذا ..انا مصرى

منذ ان نزلت الى هذة الدنيا ودخولى على ربع قرن ...لم أرى او اعرف فى حياتى اى شئ يسمى رئيس بتغير..حتى كنت اعتقد ان الرئيس هو انسان بيفضل ماسك على طول لا يتغير ولا يستبدل .. ولكنى بعد ان كبرت ووجدت هذة الصفة الغريبة الموجودة عند الغرب ..ان هناك رئيس يتغير كل 4 سنوات او لما يزود يبقى 8 سنوات ..فى الاول لم ادرك الامر واعتقد انهم يوهمننا بكلام فاضى .. وانها مؤامرة علينا .. وبدأت اسأل عن معناها فى القاموس الا اننى وجدتها هو" ان يقوم الرئيس بترشيح نفسة ويقوم اخرون بترشيح انفسهم معاها ..والشعب يختار من بينهم الشخص المناسب "..هذا كان فى القاموس ..الا اننى ما رأيتى شئ اخر تماما ..فوجدت "الرئيس يرشح نفسة ويقول لبعض من الاحزاب الاخرى يختارو واحد من بينهم يترشح امامة ..وبعدين الناس اللى امامة يقومون بأنتخاب الرئيس الذى طلب منهم يترشحوا ".. فكانت اول تمثلية يبدع فية المخرج وتيجى على القناة الاولى .. لذا اردت ان اخرج من هذا العالم الواقعى الملئ بالسيناريوهات والمخرجين فى كل مكان ..لإتخيل عالم اخر .. تخيلت –مجرد تخيل والله- ان حدث مايسمى بانتخابات عندنا وكانت نزيهة-لا قدر الله- واترشح كذا واحد والناس راحوا وانتخبوا واحد منهم ..شكل جديد فى السلطة ..ومسك البلد شخص من المعارضة الحالية .. والدنيا اتحولت بقى ..يعنى تبقى صحيفة الاهرام والاخبار والجمهورية صحف معارضة وتجد الاستاذ سمير رجب بدأ مقالة الجميل بـ"ولا تحسبن الله غافلا عما يعمل الظالمون انما يؤخرهم ليوم تشخص فيه الابصار "سورة ابراهيم الاية 42.

وتجد جريدة الدستور والاسبوع اصبحت جرائد حكومية ..ويصبح مقال الاستاذ ابراهيم عيسى مدح فى الرئيس الجديد .
تخيلت ان النظام الجديد الذى سيحكم سيحل مشاكل الناس الضعيفة والشقيانة طول الليل والنهار .. من مشاكل مادية الى رغيف عيش معفن لا تستطيع الوصول الية الى المناطق العشوائية التى تملئ مصر..ومشاكل مصر كلها تتحل والحياة يبقى لونها بامبى ..مع ان ذلك هيضطر الى غلق برامج التوك شو ويمشوا يبعوا بطاطا على النيل.

فتحت قناة الاخبار فوجدت خبر بيقول"قام الرئيس الفلانى رئيس جمهورية مصر العربية "..واجد صورة غير الصورة المعروفة ..واسم غير الاسم ..وان اجد شخض يسمى رئيس سابق ..والحياة بقى فيها اختلاف.

استغفر الله ..استغفر الله ..لازم اقوم من هذا الكابوس المزعج ..واحلام الياقظة اللى انا بشوفها دى .. واتصدم بالواقع اللى انا فية ..حتى اصل الى النتيجة الحتمية والمعروفة وهى ..انك مصرى ولا يمكنك التفكير ولا ان تحلم فى هذة الاحلام ..فهى احلام بعيدة المنال ..بل قد تكون مستحيلة .. بل قد يكون التفكير فيها فقط ..او رؤيتها فى المنام ..يزج بك فى السجن ...ويظل السؤال يطرح عليا يوميا .."لو سألتك انت مصرى تقولى اية ..تقولى مصرى متنيل على عين اللى خلفونى "..وتظل بنت الحاج عجرم تذكرنى بهذة الحقيقة المرة ..حتى اعتقدت انها تذلنى بأنى مصرى .

هذة نشرت بمجلة شخبطة العدد الاول

شخبطة ليها معنى

ان حياتنا مليئة بالشخبطة الكثيرة فى كل مكان ولكن هناك ششخبطة معروفة نعرفها وهناك شخبطة ليس لها معنى ..فأنا عندما اكتب حرف معين مثلا "ى"هذة مجرد شخبطة ..او حركة قلم ولكنها لها معنى فى عقلنا الا وهى حرف الياء .. الذى ننطقة .. فهو مصور فى عقلنا ان صورة معينة لبعض الشخبطات نفهمها عندما نراها دائما .. فلو كتبنا هذا الحرف الى اجنبى لا يعرف العربية فهو لا يفهمها ..لانة لم تسجل بعقلة معنها ..وهو لة شخبطة اخرى لها معنى فى عقلة غير هذة ..ولها ادراك معين ..سواء ان كان حرف او كلمة او غير ذلك فمنذا نشؤت وانا ارى كلمة القرآن الكريم مكتوبة بنظام معين بالتشكيل وضورتها مرسومها فى عقلى ..وبينما انا امشى فى الشارع فوجدت كلمة مكتوبة بنفس كلمة قرآن كريم ..فعندما نظرت لها لاول مرة اعتقدت انها "قرآن كريم"ولكن عندما دققت نظرى لقراة الكلمة وجدتها "فِراشة الربيع"كذلك هذة الكلمة التى امامك ان قراتها لاول مرة قد تقرأها بفتح الفاء ..فتكون "فراشة"التى تطير ..ولكن هى بكسر الفاء اى فِراشة ..وهو المسئول عن أقامة الفراشة للحفلات وهكذا .. فتجد ان الكلمات والاشياء كلها مجرد شخبطة ..ولكنها تختلف هل الشخبطة لها معنى بالسبة لى اما لا ..وهنا فى المجلة شخبطة لكل الناس لكنها شخبطة ليها معنى.

لن تنتهى من هذة المجلة الا وقد استفدت شيئا جديدا فى حياتك وان كان صغيرا ..فأنت قد تستفيد معلومة جديدة لم تعرفها من قبل ..وقد تتعلم شئ جديد من قراتك للمقال وقد تستمتع بقرأة شئ يريحك او يجعلك سعيدا ..فأن كنت مهموا ..فانا مجلتنا هى حلك ..وان كنت سعيدا فمجلتنا تزيدك سعادة ..وان كنت تريد الافادة فمجلتنا مفيدة لك بكل المقاييس ..وان لم يكن كذلك فلا تقراها بعد ذلك ..فأنا اجزم بأنك ستستمع بقراتك للمجلة ..وتابع معنا كل جديد وممتع فى شخبطة ..وليها معنى.

هذا الموضوع نشر فى مجلة شخبطة - العدد الاول

لتنزيل العدد الاول من المجلة على 4shared أو madiafair

والعدد الثانى من مجلة شخبطة منة موضوع عن ما يحدث فى مصر والجزائر

وتحقيقات وحوارات عن هذا الموضوع لتحميلة madiafair