أخبار بورصة التهييس

طرح أسهم جديدة فى البورصة لرغيف العيش وذلك للإكتئاب العام

لجميع فئات الشعب وعلى جميع افراد الشعب الاشتراك فى الاكتئاب و سيتم توزيع الاسهم على هيئة ديل فار بداخل الرغيف مع العلم بأن اذا جمعت الفار تاخد رغفين هدية.

بعد انتحار الكثير بسبب خسائرهم فى البورصة .. ٌقررت الحكومة بزيادة فى الخسائر ليزداد كمية الانتحار الذى يزيد الوفيات مما ينتج عنة تقليل فى عدد السكان ..فتكون قد حُلت المشكلة السكانية.

حدوث مضاربة كبيرة بين الاسهم وبعضها مما ادى الى سقوط 20 جريح منهم 2 فى حالة خطرة وأيضا تم غلق السوق على صباع أحد الاسهم مما نتج عنة قطع بوز السهم.

عمل اضراب كامل لأسهم الغزل والنسيج وذلك احتجاجاَ على عملية الصكوك وانهم احسوا بأنهم اتصكوا على قفاهم.

تعلن شركة غازأبو ماضى بتوزيع اسهم غاز مجانية مع امكانية التوصيل للمنازل وذلك لغير المصريين.

أما اذ انتقلنا الى بورصة التهيس العالمية فنجد أن "الجزمة" الاقتصادية اثرت على كل شباشب العالم وارتفاع تضخم القباقيب وقد صرح الرئيس الامريكى بصرف قباب لكل مواطن وذلك لضرب البورص المصرى لانة يقوم بالتحرش بالبورصة الأمريكية .

أزاى نسامح بعض

نظرا لكلام اختنا "البت المشمشية ..حلوة بس شقية"

وانقلاب معظم المدونات الى هذا الموضوع

وهو موضوع "ازاى نسامح بعض"

فالتسامح قد يكون نعمة كبير للأنسان قد يشعر بعدها براحة نفسية لا يشعر بها من قبل

وبالرغم ان التسامح قد يكون شديد على الانسان فى بعض الاوقات

وذلك لنظر البعض فى انة نوع من انواع الضعف امام الشخص الاخر

ولكن اذ وضعنا انفسنا مكان الشخص الاخر سنجد العكس

فلو قام احد بمسامحتى على شئ ..سيكبر فى نظرى جدا

وسيكون انسان غالى بالنسبة لى

ولقد ضرب رسول الله ـ صلى الله عليه وسلم ـ عشرات الأمثلة على التسامح والعفو، وعلى نفس الدرب سار الصحابة رضوان الله عليهم .. قال الله تعالى:"خذ العفو وأمر بالعرف وأعرض عن الجاهلين" .
وقال تعالى: "وإن تعفو أقرب للتقوى" ..وقال صلى الله عليه وسلم: "أفضل أخلاق أهل الدنيا والآخرة أن تصل من قطعك وتعطي من حرمك وتعفو عمن ظلمك".

فنجد ان امثلة العفو والتسامح فى القرآن والاحاديث الشريفة كثيرة

اخى ..اختى

سامح كل من حولك ...ليرتاح قليك ..وتنعم بحياة سعيدة

اقبل الناس على ما هم عليه وسامحْ ما يبدرُ منهم , واعلمْ أن هذه هي سنة اللهِ في الناسِ والحياةِ .

كلمة انا اسف ليست عيب فقلها ..وانسى ما مضى

لا تغضب ، واصبر واكظم واحلم وسامح ؛ فالعمر قصير .

فتنة 2009

رد الشيخ محمد حسان على المدعو عمرو خالد الضال المضل

هذة هى الجملة التى انتشرت جدا فى الايام الماضية ..رد شيخ على شيخ ..فانتشرت على الانترنت وعلى التليفونات الجوالة وسمعاها كثير من الناس ..وخاصة الشباب.

وبدا كل شاب ينفع ويدافع عن شيخة وعن استاذة ضد الشيخ الاخر وان شيخة لا يخطئ ابدا..وانما هو معصوم من الخطا.

فهذا الفيدو الشهير الذى قال فية الشيخ محمد حسان "انت اللى فاشل وافشل اهل الارض"..وطبعا اخوتنا الجمال انصار الشيخ محمد حسان ..لازم يبينوا الصواب فقاموا جايبين جزء من محاضرة لعمرو خالد ..والجزء بتاع الشيخ محمد حسان وطلعوا رد على عمرو خالد.

انصار الشيخ محمد حسان::الشيخ طبعا بيتكلم صح ..ازاى يقول كدة هو بيستهبل ولا اية ..اهى دى الردود ولابلاش

انصار الاستاذ عمرو خالد::شوف ضيق الافق وعملى نفسة شيخ ..اهما دول شيوخ السلفية التعبانين.

أنصار الرذيلة::اهما دول اللى انتوا بتسمعوهم قاعدين يهزقوا بعض ..ويشتموا بعض عى الفضائيات

وهكذا الكل نظر الى شيخة ودافع عنة بكل ما يملك ... والمستفيد الوحيد هو الشيطان...وظلنا همنا كلة هو ماقال الشيخ صحيح ولا خطأ..وندافع عن اى احد حتى لو اخطئ..ونسين الاهم من كل هذا وهو الدفاع عن الدين

فالشيخ  محمد حسان وارد ان يخطئ..فهو ليس معصوم من الخطأ..فزمن العصمة ذهب بموت الرسول صلى الله علية وسلم

وكذلك الاستاذ عمرو خالد قد يخطئ...هو ايضا غير معصوم من الخطا

واى شيخ فى الدنيا يخطئ ويصيب...ولا احد معصوووووووم

طيب مارأى الشيخ محمد حسان فى الاستاذ عمرو خالد؟؟

سئل احد طلاب علم الشيخ محمد حسان سؤال فى درس الخميس بمسجد التوحيد بالمنصورة

طالب العلم:مارايك فى الحليق عمرو خالد؟

الشيخ محمد قال لة:انت مين انت علشان تتكلم على الاستاذ عمرو خالد ..الاستاذ عمرو قدم للاسلام والمسلمين اشياء كثيرة ..فقد اهتدى على يدة أناس كثيييييييييير..

قد يكون هذا المقطع لم ينشر على موقع اليوتيوب ولا يظهر ابدا..فطلاب العلم لا يريدون ان ينشروا هذ المقطع

قد يسأل البعض طيب ازاى مع ان الكلام دة بيتناقض مع الكلام اللى قبلة ..وهو اتهام بالفشل

دا طبعا غير الرد على مصطفى حسنى اللى الشيخ محمد حسان رد على موضوع البدعة فى خطبة ..وكذلك رد شيوخ اخرين مثل الشيخ ابو اسحاق الحوينى... والشيخ مازن السرساوى

هقولكم على حاجة احنا بنقع فيها كلنا ..هو الفرق بين تصحيح الخطأ والشخص نفسة

يعنى عندما يخطئ احد الاشخاص ..يجب تصحيح الخطأ..وبالذات لو كان لة تأثير على ناس كتيير

ولكن هذا لا يمنع ان الشخص سئ..او  لا نسمعة

فلو كل شخص اخطأ لم نسمع لة ...لم يتبقى احد نسمع لة

انا بكتب الموضوع دة علشان اقولكم بأعلى صوتى

"احذروا الفتنة التى ستقع..وحرام عليكم بقى"

لان فية مخطط ..احنا بنعملة وغيرنا بيجهزة لينا ..والله العظيم مخطط ومتجهز لينا

الموضوع دة ان فضل على الحال دة ..فانا اتوقع فى أقل من خمس سنوات ستقع فتنة فى مصر

بين المسلمين والمسلمين ..لا وبين الملتزمين والملتزمين

كما حدث فى بعد وفاة الأمة الأربعة ..وتعصب كل شخص لشيخة وحدث بعدها مجازر من اجل الشيوخ

فقد تعلق  الناس بالشيوخ ونسوا الاصل وهو الدين

هقولكم على اللى بيحصل

اول حاجة ..يرد الشيخ ذو مكانة بين الناس على خطأ لشيخ اخر ..قد يقع فية ..وهذا جائز..فيقوم طالب علم بلزق الاثنين بجانب بعض ويقول رد فلان على علان وينشرها على النت.

تانى حاجة ...يأتى شيخ مغمور لا يعرفة الكثيرون ..فيقوم بالرد على شيخ بالسب واللعن ..وهذا حراااااااام ..ويقوم اخرين لنشر هذا الرد ليشتهر هذا الرد

ثالث حاجة ..ودى الاهم ...هناك بعض الشيعة عملوا مواقع يسمونها "اهل السنة والجماعة"..من هذة المواقع التى تعطى السم فى شيوخ السنة ..فيقيمون بتكفير وذندقة الشيوخ ..وهؤلاء لا اعتقد انهم لم يتركوا شيخ الا واتهموة بالكفر

فقد اتهموا الاستاذ عمرو خالد والشيخ عائض القرنى والشيخ الالبانى رحمة لله ..والشيخ يوسف القرضاوى .

وقد استمع الى هذة الفيوهات اكثر من مليون شخص...وهذا فعلا بداية الخطر

طبعا انا واحد عادى او اى شخص ممكن يقع فى الخديعة بسرعة ..فانا لما لقيت الشيخ محمد والشيخ ابواسحاق بيردوا على شيخ اخر..فمن العادى انى لما الاقى حد تانى بيرد وبيكفر ..هفتكر انهم تابعين للشيوخ ..وطبعا الموضوع دة اسأة للاثنين

للكل سواء الرادد الو المردود علية

احذروا هذة الفيديوهات كلها سواء كانت رد لشيوخ ..او رد لناس تانية رويبضة ..سواء تابعين للشيعة او تابعين لجماعة التكفير والهجرة

والرجاء عدم نشرها على الانترنت ..لاننا نروج الى فتنة قادمة ..ليست عن الدين ولكن عن الشيوخ

وبالنسبة للشيوخ لازم نقبل الخطأ..فلو احد اخطأ مثلا ..نقبلة ونحسن النية بة..فنحن لسنا فى حرب

ولكل من يتكلم عن اى شيخ من شويخنا

او استاذ من اساتذتنا ..ان يتكلم باحترام

فهم قدموا للاسلام .

مالم يستطيع المتكلم عنهم ان يقدم شعرة مما قدموة

حفظهم الله لنا ..وجعلهم زخرا للاسلام والمسلمين

وثبتنا على الحق

فى النهاية أذكركم بحديث الرسولe

انظر إلى رسول الله e .. وقد رقى منبره يوماً ..

وخطب بأصحابه فرفع صوته حتى أسمع النساء العواتق في خدورها داخل بيوتهن ..!!

فقال e : يا معشر من آمن بلسانه ولم يدخل الإيمان إلى قلبه .. لا تغتابوا المسلمين .. ولا تتبعوا عوراتهم ..فإنه من يتبع عورة أخيه .. يتبع الله عورته .. ومن يتبع الله عورته .. يفضحه ولو في جوف بيته

**********************

اخى الكريم

لا يوجد احد معصوم من الخطأ

فكل أنسان يخطئ ويصيب فلا تتبع عوراتهم وأخطائهم

لا تهاجم شيخ من أجل شيخ أخر ...فنحن أقل من أن نهاجم

شاب السيس والسياسة

بعد ان اطلقت كلمة الشاب السيس على كثير من الشباب بتاع توتى وفيفى ..والكلام بمياعة

الا ان اللى الناس متعرفوش ان كلمة السيس تأتى من السياسة..فمعنى كلمة الشاب السيس هو انة شاب سياسى بحت..هذا ما أوضح الاخ توتى

وفى انتخابات 2011 قرر شاب سيس من شباب اليومين دول ان يترشح كرئيس للجمهورية

واحنا ماشين قبلنا الشاب السيس اللى اسمة توتى اللى هيترشح لرئاسة الجمهورية  وعملنة معاة حوار

أنا:اية اللى شجعك ياتوتى انك تدخل انتخابات زى انتخابات الرئاسة مرة واحدة؟؟

توتى:بص يامان انا بصراحة كدة ...لقيت ان رئاسة الجمهورية دى وظيفة كووووووووول اوى ..ودة رهان مع البت سوسو على كارت بعشرة جنية ..وكمان لقيت انى اقدر اظبط بنات اخر حاجة والموضوع دة عايزة سياسة جامدة مووووووووووت.

انا:طيب تقدر تقولنا برنامجك الانتخابى هيبقى فى اية بالظبط؟؟

توتى:هقولك على حاجة اللى انا هعملها ان البلد كلها تبقى سيس ..هنزل قرارات بأن كل واحد يسيس امورة مع واحدة واتنين وتلاتة ويعيش حياتى ..لازم الشعب يعيش..وكمان هدعم البانجو والحشيش علشان الناس اللى مش لاقية تاخدة ..والناس اللى مش لاقية عيش تشرب حشيش...وبالنسبة للبطالة انا هقضى عليها خالص ..بشغلانة بسيطة جدا وهو كل واحد يقعد يشتغل نفسة او يشتغل اللى جنبة والبلد تتملى اشتغالات وتبقى كووووووول كدة

انا:هل تتوقع انك هتلاقى اقبال من الناس ؟؟

توتى:طبعا هلاقى ..هو الشعب نفسة فى اية ان يهيس "وهيس هيس علشان تبقى شاب كويس"وانا بما انى خبرة سيس من زمان اعرف ازاى اسايس الشعب ..وانا بس لو رشحونى البنات اللى انا عارفهم هنجح على طول .

انا:بس شكلك كدة الناس مش هتتقبلة ..هما عايزين راجل "عذرا يعنى"؟

توتى :انا شكلى كدة هو دة اللى هيخلى الناس ترشحنى ..لما يلاقى شعرى اللى جايب الاف ام ..وبنطلونى الساقط والقميص اللى طالع منة حتة وداخل منة حتة وانك تبى ماشى سايب نفسك خالص..كل دة دليل على التغييير ومن موقعى هذا انا بقول للشعب المصرى انى بدأت التغيير من نفسى الاول .

أنا:وبالنسبة لسياستك الخارجية؟؟

توتى :لالالا..انا فى السياسة الخارجية دى اعجبك جدا..انا بس اروح اعمل حبت علاقات مع حريم العالم مع هلارى مثلا واخلى كلينتون يخلعها ..وانا بقى فى التسنيج انفعك اوى ..والمهم اخلى العالم كلة يهيس ويعمل دماغ كويس.

أنا : وقضية القدس والصرع الفلسطينى الاسرائيلى؟

توتى:القضية هتتحل فى كمتين نعمل قعدة عرب ..ونصفى بنهم وخلاص وكلة يروح لحالة ...بس انا اعرف بس القدس دى فين وانا على طول هروح انا بنفسى اخلص بين الاتنين ..وكلنا مصرييييييين

أنا: يظهر انك متعرفش حاجة عن فلسطين اصلا..على العموم اتقرفنا بمعرفك ونأسف للوقت اللى ضيعناة معاك

توتى :انا اللى اسعد بمعرفتك ..وهروح بقى الحق نانا علشان زعلت منى وانا ببوس كوكى

ومر عام كامل

كنا فى مثل هذة الايام نجلس لنتسامر ونضحك ونفيد ونستفيد ..لنتكلم ويعلو البسمة شفتية الجميلتين ..فكانت هذة البسمة لاتفارقة ابداً ولهذة البسمة احبة الجميع ..وكلامة الجميل الذى يملئ كل الارجاء من حولنا.

تقابلنا صدفة فى البداية نجلس مع بعض فى المدرسة فأحببتة واحببنى وظلت علاقتنا مدى حياتة لا تنقطع ..وظلت الايام تدور وتدور ايام ثم أعوام وظللنا مع بعض طويلا...حتى جاء يوم وقابلتة ..ومشيت معة لشراء بعض الحاجات لة ..ثم ذهبنا الى بيتة وظللنا واقفين هناك نتكلم كما نتكلم مع بعض حتى جاء زملائة وأرادوا أن يأخذوة معة..فقلت لة بان يذهب مع زملائة ..ويالايتنى لم أقل لة ..فلم افكر قط ان هذة اللحظة ستكون اخر لحظة سأتكلم معة بها ..وقلت لة مع السلامة.

ومر هذا اليوم كأى يوم عادى ..وجاء اليوم الثانى ليمر على سلامى لة 24 ساعة فأراة سائقا للسيارة ..من بعيد هو وزملائة ويظل اصدقائة واصدقائى يروة كل واحد منهم فى مكان متغير..حتى جمعنا وجلسنا فى المكان الذى كنا نجلس فية دائما..لنتكلم ونضحك ..وفجأة

جأت عربة الاسعاف ومرت من جنبنا ..حتى انها تركت المستشفى واستمرت فى طريقها ..ونحن نضحك ونقول "هى عربية الاسعاف نست المستشفى ولا اية"..لم يخطر ببالنا قط انها ذاهبة لاحضار صديقنا الذى بين الحياة والموت ..فكنا نضحك وصديقنا يتألم من شدة الالم ...وذهبنا كل واحد الى بيتة ..لينام على سريرة الناعم ..ولا يعرف ان صديقة سينام اليوم فى قبر موحش ..وأستيقظت على بكاء وصراخ امى وهى تقول لى "اصحى بيقولوا ان صاحبك مصطفى مات"...وكأن أحد لطمنى بمرذبة على رأسى ..فلم استوعب الامر ابدا..ونزلت ومشيت فى الطرقات لا ادرى اين اذهب ولا من اين أتى ..حتى وصلت الى بيتة ..ووجدت أناس يجلسون على الكراسى فإزداد عدم استيعابى اكثر..وجأت الصدمة فلم افيق منها لمدة اسبوع ..امشى فى هذة الدنيا لا اعرف ما يجب ان افعل لصديقى.

ومر عام على هذا اليوم ..عام ننتظر رؤيتة فلا نراة الا فى المنام ..كأنة يأتى لنا لنشعر انة مازال بجانبنا..فلا نملك له الا دعاء ندعوة بة فى صلواتنا.

رحمك الله ياصديقى ..فقد ذهبت ..ولكن مازل قلبى يضع صورتك امامى ..ويتذكرها دائما بكل خيركنت تفعلة .

رحمك الله ..واسكنك الله فسيح جناتة ...وأسأل الله العظيم ان يجمعنا فى الفردوس الاعلى مع الصديقين والنبين والشهداء .

خارج النص:بعتذر عن هذا البوست الحزين ولكن قد تقولوا انة فضفضة مع القلب ومعكم .

الإحتلال الفلسطينى لإسرائيل

 تصدق بالله انا معدتش عارف مين اللى محتل مين  اسرائيل اللى محتليا فلسطين ولا فلسطين اللى محتلى اسرائيل..طبعا انتوا هتستعجبوا ..بس الواقع اللى حواليك هو اللى واقع يتوة..ميعرفكش مين الظالم من مين المظلوم.

خبرين تحت بعض خلونى اكلم نفسى

الخبر الاول:زيادة نسبة تصدير الغاز الى اسرائيل الى 50% وبنفس السعر

فعلا يعنى  اصل انتوا عارفين ياعينى على اسرئيل دى مقطوعة من شجرة وملهاش حد يمولها واية يعنى لو نزودلها شوية غاز مهو مرطرط عندنا اهوة ومش عارفين نودية فى حتة والفلوس مش مهم ..مش الشعب مرتاح اخر راحة ..ومن كتر الراحة بقى بيكلم نفسة ..وبعدين متنسوش دى جارتنا ..والنبى وصى على سابع جار ..زود ياعم ليهم كدة ...وخليك كريم كدة وبلاش جو البخل اللى انت عايش فية دة..والطب اتقدم الوقتى ..وقال اية المحكمة طلعت ان تصدير الغاز لاسرائيل لا يجوز ومينفعش هى المحكمة دى بتفهم حاجة فى السياسة ..ولاتفهم حاجة فى البتنجان .

الخبرالثانى:اكتشافت القوات المصرية 8 انفاق جدد يرسلون منها غذاء لأهل غزة

يالا العار والتار والفار...شوف العالم دى ياجدع عايزين ياكلوا..مش مكفيهم الاكل اللى اكلوة فى اول السنة ..ولا هما عاملين زى القطط ياكلوا وينكروا..دا كلوا ضرب لما قالوا بس..عايزين اية كمان... وشغل التهريب دة ...بيهربولهم اكل ..مش كفاية كانوا قاعدين يضربوا طانت اسرائيل..طيب مش عارفين يهربولهم حشيش ولا بانجوا كنا قلنا ماشى ...مش يهربولهم أكل ..الحمد لله انهم اكتشفوا الانفاق دى ...لازم نقطع عنهم الماية والاكل والهوا ...وكل حاجة ..علشان دول عالم متختشيش.

بذمتكوا عرفتوا مين اللى محتل مين اسرائيل اللى أحتلت فلسطين

ولا فلسطين اللى أحتلت اسرائيل

لو عرفت الاجابة ...متتصلش علشان التليفون اتسرق..بعد موضوع الحرامية على طول

الواحد معدش عارفة هى بقت الاصل السرقة...والناس الشريفة معدش خالص..ربنا يستر علينا يارب

حرامى غلبان

دة اول موضوع فى مجلة ميكانوا ليا ..فى العدد الاول

تعريف الحرامى:هو كائن حى زينا يعيش ويتعايش وبياكل زينا برضة والعجيب بقى انة بيشرب  وبيمشى زى الناس.

انواع الحرمية

1-حرامى غسيل...فقرى طول عمرى غسيل اية بس اللى بيسرقة

2-حرامى حيوان:مش شتمية له ولا حاجة ولكن اطلق علية هذا الاسم لانة بيسرق الفراخ والبط ماشابة ذلك ودة فوق الفقرى بدرجة

3-حرامى متطور:ودة بقى بيستخدم اساليب جديدة فى سرقة ماقل حجمة وزاد ثمنة من غير ماحد يشوفة

هما دول بس انواع الحرامية اللى كنا نعرفهم واحنا صغيرين ..بس يدوبك فات كام سنة ..وطلع اسماء حرامية جديدة..وانواع جديدة..نبدأ من الصغير للكبير بقى

4-حرامى بالأكراة:ودة مبيطلعش عليك ماطوة ولا حاجة ..دة بيسرقك بمزاجك ..ويتواجد هذا الكائن فى المصالح الحكومية ..وهنا ياالدفع ياتروح

5-حرامى نت:ودة كائن متتطور مع التكنولوجيا  الجديدة..بيساير التقدم العلمى..فى المنطقة ..احلى حاجة فية بيسرق عبر الانترنت ..وهو قاعد فى بيتة

وهؤلاء صنفان 

أ-بيسرق حاجات كبيرة ..حسابات بنوك..

بـ-بيسرق حاجات بسيطة ..ايميل او موقع  او حساب على الفيس بوك..اهوة بيمشى حالة ..ودة فقرى متحضر..مثلة مثل بتاع  الغسيل بالظبط.

6-حرامى بلد:ودة بقى الكبير اوى بتاعهم ..دة بيسرق بلد ولا اتنين ويهرب برة البلد ..يعنى ينصب على شعب مثلا...ولا ياخد قرد..قصدى قرض ويخلع برة البلد..والبلد بقى تقعد تقولة متزعلش ..طيب بس تعالى..وهنجبلك شوكلاتة..طيب هنعملك مساكن شعبية ..طيب اسرق كمان سريقة ..يعنى هتهرب بكام مليار بس ..هتعمل بيهم اية يعنى ..وتعيش منين ..طيب ولادك زنبهم اية انهم يعيشوا بحبة مليارات دول بس..وهو مطنش ومش عايز يجى.

بعد ذكر انواع الحرمية ..لازم تذكرهم كويس ...علشان تعرف تسرق  معلومات من اللى جنبك.

وانتظروا العدد التانى  قريبااااااااا

اشتغالات اوباما

اوباما طلع قاعد يشتغلنا ..واحنا ماشى ماشى وخلاص

ياسلام لما اوباما جاء الى مصر ..وقال كلامة المعسول..الذى رطب لسماعة الكثير..وانتظرة الكثير والكثير

وكان بالنسبة لى خطاب مميز وجميل ..اذا نُفذ ما بدخلة

فأنا لم انظر الية بنظرة صلاح الدين ..اللى هيحرر الاقصى...وانما نظرت الية نظرة رئيس امريكى يسعى الى السلام ..ودة حاجة كويسة .

بس هو اتضح انة عايز يرضى كل الاطراف..وهذة هى المشكلة

يعنى يجى عندنا ويقول أيتين من القرآن...واحاديث ..وانة ليس مع اسرائيل

فى عملية الاستيطان ...وحل الدوليتن ..والخروج من العراق

واحنا بقى اتسلطنا اوى بالكلام دة

ودة طبعا لاننا احنا طيبين ..وشعب عاطفى ...بس لما بيعور بيعور جامد

ومبيرحمش

المهم عمك اوباما ..راح عند اسرائيل...وام قايلهم شوية كلام ...عكس الكلام اللى بيقوله عندنا ..ومضاد لة ..علشان يرضيهم

على العموم دة مقطع من بتاع اوباما اللى على اليوتيوب

على فكرة

اليوتيوب مسحت المقاطع دى كلها ...بس فى ناس رفعتها تانى

يعنى المقطع دة ممكن يتمشح فى اى وقت

مصر هى كورتى

ماشى فى امانة الله ...فى شارع فاضى..سرحااااااااااااااااااان خالص ..وبفكر فى حاجات(مش هقولكوا بفكر فى اية متخفوش)..المهم وانا ماشى ..اذ فجأة ..لقيت نفسى بجرى ....لوحدى كدة .لية؟؟.اتارى فى حوالى عن 80 مليون مواطن فى مصر قالوا فى نَفس واحد......

 "جووووووووووووووووووووووووووووووووووووووون"

كانت مصر بتلاعب ايطاليا ....وفى جو الهدوء الذى يتسم بة الشارع ...والناس من  حولى تترقب اى هجمة لمصر ....على ايطاليا ...يطلع هذا الصوت ..وبعد ما مشيت شوية كمان ....انظر الى القهاوى من حولى..فأجد الناس من حولى ..يجلسون امام التلفاز...بنفس طريقة جلوس الطلبة فى المدارس... صف خلف صف ...والكل مبحلق عنية فى التلفاز ...ينظر الى هذة الكرة ..الذى يتعارك عليها 22 شخص....ليستطيع احدهم ان يأخذها ..ويصوبها نحو هذة الشبكة التى تكون بين عارضتين .

والحمد لله ..اتغلبنا من الجزائر ومصر كلها كانت مهمومة يومها ..وكأنة يوم نكسة 76...ثم اتغلينا من البرازيل...ولاكن فى هذا الوقت فرح المصريين لخسارتنا الجميلة ..فمن اجمل ما قرأت ..ان احنا عاملين زى الواحد اللى لو ضربة على قفاة حد ملوش لزمة يزعل اوى ...وطبعا هيردهولة ويمسخر بكرامتة الارض...اما لو ضربة على قفاة شخصية هامة يبقى مبسوط اوى ...ويمشى فى الشوراع كل اللى يقابلة يقولة دا هذة الشخصية الهامة ضربتنى على قفايا ..واعتبر الشخصية الرمة هى الجزائر..والشخصية الهامة هى البرازيل

وبعدين جاتلنا الفرصة التاريخة اللى غلبنا فيها ...ايطاليا "اللى هتمنع الحمص عاد يتاكل عندها تانى "..ووجدنا البهجة على وجوة المصرين ...ورجعت لكل فرد انتمأة لوطنة ...الذى لا يظهر هذا الانتماء الا عندما نكسب مبارة ..على دولة اخرى...فانت ان لم تشجع مصر ..اذن انت عميل وخائن ... فلما اتغلبنا من الجزائر..واحد فرح للجزائر طلع علية انة عميل ...مع ان دول يعتبروا زى اخواتنا ...يعنى عرب ومسلمين زينا ..لكن فى الحالة دى تبقى عميل..ونسى "حب لأخيك كما تحب لنفسك"

واللى فرح لإن البرازيل غلبتنا ...دة مصرى اصيل ...وبيحب بلدة ..

فهل اصبح الانتماء للبلد فى حالة الكورة بس ...ياعينى عليكى يامصر وانتى بقيتى مجرد كورة ....مرة تخيب ومرة تصيب...واهى ماشية ...وبعد كدة ابقى العبى كويس يامصر ...علشان نحبك

تاااااااااااااج...اخيرا

وزع ورق الاسئلة

وزع ورق الاجابة 

وزع الاجابة

وزع 7 جنية لكل واحد

وزع الغداااا

دى تأثيرات من الامتحانات....وشكلها كدة هيبقى فى مضاعفات ..ربنا يستر

اول تاج يدخل المدونة ..من يوم ما عملتها....

التاج دة جالى من اتنين 

1-بنت ابيها

2-Soul.o0o.Whisper

تسلمولى على الهدية الجميلة دى

من أنت ؟

انا ....انا ..انا ..انا مش عارفنى ....انا مش انا ...انا مصطفى

وما الذى تفعله هنا؟
طيب لية الاحراج دة بقى

بعمل زى ما الناس بيعملوا

بحل التاج

إسرائيل تقصف كل جنوب ممكن بحثا عنك ، أى شمال ستقصد؟ .

هقصد مصر طبعا...فمصر خالة الدنيا

أنت مكلف بحذف حرف من حروف اللغة العربية .. أيها ستختار ولماذا ؟
انا اللى هحذف من اللغة العربية ...لية

دا العربى بتاعى مكسر

لو قدر لك أن تدخل السجن فما هي القضية التي تتمنى ان تدخل بها إليه؟

سجن ...يانهار ابيض..شكلى على اخر التاج دة هروح المعتقل ولا اية

بس لو دخلت يبقى اروح ازور واحد ..بس لو حلفوا عليا ان ادخل بقى خلاص

مش هدخل برضة.

بالمناسبة.. منذ متى اكتشفت نفسك؟

يظل الانسان كل يوم ..يبحث عن نفسة ...فيظل يجمع من نفسة اشياء ..حتى اخر رمق فى حياتة ...(حلوة رمق دى)

على مفترق طريق لافتتان ، اليمنى تقول ( إلى حلمك ) واليسرى تقول : ( إلى مالم يحلم به البشر ) ، أي الطرق ستسلك ؟

سأذهب الى حلمى الذى لم يحلم بة البشر

نحن لا نعيش حياتنا بل نتعلم فيها كيف نعيش ما تعليقك؟

نحن نتلعم كيف نعيش حتى نستطيع ان نعيش

بجملة واحدة فقط أكتب تعريفاً لكل كلمة من الكلمات التالية:

الوطن

هو المكان الذى يشتاق الية قلبى

الأم
هى كل شئ فى الوجود

الليل

هدوء..سكون..راحة

الحب

هى اسمى ئ فى الانسان ..لمن يفهمة

أمريكا

اكبر واعظم وارخم دولة شوفتها

المرأة

جوهرة ثمينة ...لمن تريد ان تكون كذلك

الصمت

الصمت فكر ..تدبر...عمق
الانترنت

المفيد المضر

أخترمنصباً واتخذ قرارا ؟

وزير الاقتصاد

وضع نظام اقتصادى جديد قائم على الشريعة الاسلامية

قيس، عنترة، جميل، هم الذين يقولون شعرا، وليلى وعبلة وعزة «صموت» لماذا هذا التغييب للمرأة؟

اصل بصراحة هما كانوا بيتقولا عليهم ....

بس بسم الله ماشاء الله ..الوقتى معدش صموت...واصبحت نانسى وهيفا موجودين الوقتى...ملهومش حجة

إلى أين تمضي كلمات الحب .. بعد أن نقولها؟

تمضى الكلمات الى الاذان .... ولكن تمضى المشاعر اللى الاحساس

هل تجد علاقة بشكل أو بآخر بين المرأة وقطاع الطرق ؟

طبعا...وعلا قة وطيدة كمان

فقطاع الطرق يطلق عليهم اسم الشطار....

والمرأة يطلق عليها الشاطرة ...اللى تعرف توقعلها عريس الوقتى

هذا فراق بيني وبينك .. متى ولمن تقولها ؟

لا اقولها لأحد ...فأنا لا احب القطيعة بتاتا

كيف هو غداً ؟

الغد عند الانسان ...امل

الغد عندى ..الخميس

امرر التاج للممرش علية

بلاد السحر والخيال – محمد عبدالرحمن

ومضات – د: ياسر عبدالفتاح
تخاريف ايوشة – ايوشة

 Gogo!sf 

قرار من العبد لله..المدنة هتشتغل بنظام شبة يومى ...يعنى هقرفكم كل شوية 

استحملوا بقى ..الاجازة جت على دماغكم بقى

وانا بكلم اوباما

رغم إنى قولتلة .. خلاص الموضوع خلص..بس هو برضة مفيش فايدة فية.

هقولكوا الحكاية ..انا لما عرفت ان أوباما هيتكلم عن حقوق المرأة ..زى ما قولتلكم فى البوست اللى فات..أمُت جاى عامل حركة مجدعة ..أول ما جة اوباما مصر وشغل خط الاتصالات بتاعة ...قمت متصل بية (مع ان الدقيقة ب40 قرش)قطمة وسط يعنى ..بس اتشجعت واتصلت..والمكالمة كان شكلها كدة.

 الصورة اللى فوق مش انا...دا واحد تانى..والتانية وهو بيكلمنى

مصطفى: أوباما ..حبيب هارتى

أوباما:تمام الحمد لله ...ممكن اعرف مين معايا

مصطفى: بقى مش عارفنى ياراجل...دا انا كدة هزعل

أوباما:لا والله معلش اصل ..الارقام على الشريحة التانية ..ومش واخد بالى من الصوت

مصطفى:ماشى يارايس..كبرت علينا بقى..انا مصطفى بتاع مدونة فك زنقة

أوباما:ااة..مصطفى ....ازيك يا مصطفى وحشتنى ووحشنى موضوعيك الحلوة..انت فين يابنى من زمان

مصطفى :انا موجود ..بس انت اللى نسيتنى..بقولك اية علشان معطلكش ..وانا عارف انت جاى 8 ساعات بس..فاكر موضوع الرجالة عقلهم كبير

أوباما:ايوة..صحيح انا كنت هرد عليك فى الخطاب بتاعى النهاردة على الموضوع دة ...انت عايز تودينا فى داهية.

مصطفى ..اسمع بس..انا بعدها نزلت موضوع اسمة الستات عقلها كبير..واعتذرت فية ياعم..وخلاص بقينا اخر تمام..والحريم كلهم انبسطوا منى ...والموضوع انتهى...فمفيش داعى تعمل قلق بقى وضجة ...علشان هتخلع من هنا ..وانا هترمى فى المعتقلات من هنا.

أوباما:ياخبر لية ياراجل..بس الخطاب اتكتب خلاص ...على العموم انا مش هجيب اسمك انا هتكلم عن الموضوع بشكل عام ..ومش هجيب سيرتك خالص..كدة قشطة

مصطفى :خلاص قشطة...وابقى سلملى على هلارى

أوباما..اية احنا مش هنشوفك فى المؤتمر ولا اية

مصطفى:لا ياسيدى مجاليش دعوة ..وبعدين انا لسة هسافر..على العموم انا هشوفك من التليفزيون

أوباما:ماشى يادرش ..مع انى كنت عايز اشوفك بس يالا خير

مصطفى:المرة الجاية بقى...سلامووووووووز

أوباما :سلاموووووووز

وانتهى الحوار لغاية كدة ... وقفل السكة ..واحد حدق يجى يقولى "هو اوباما بيتكلم عربى"..هقولة ياحدق..دى الترجمة بتاعة المكالمة .

هانت اهى لسة اسبوع واخلص وافضاللكم بقى..والمرة الجاية جايلى اول تاج فى حياتى هجوبكم علية ان شاء الله

الستات عقلها كبير+خبرعاجل

خبر عاجل....انطلقت الان مجلة ميكانو ..وتم نشر موضوع "نيو حرامى" بتاعى..اقرأوا وقولوا رأيكم

بعد التهديدات اللى جأت ليا...والمواجهات والمصارعات اللى وجهتها...وبيقولوا ان cia دخلوا مصر
واوباما جاى يتكلم مصر مخصوص علشان يتكلم عن الموضوع دة
وغوانتنموا شكلها هيفتحوها تانى. مخصوص علشانى
واخذأ بمدأ" الحيطة والجزر"
وبعد كمان م قرأت ان واحدة قتلت جوزها..علشان بتحب جوز خالتها..(مش عارف خالتها دى اونطة ولا اية)
والروح النسأئية العدائية فى المجتمع
صدق القائل
"اتقى شر الحريم اذا غضبوا"

انا بوجة كلامى لكل اللى شايل منى فاكرنى معادى للسامية ..ومن الذين ضيعوا حقوق المرأة ..فى المجتمع
والموضوع جايز يوصل لجميعية حقوق الانسان فى العالم
وبصراحة انا خايف على حماتى..قصدى حياتى
هخاف على حماتى لية بس..انا خايف على حياتى
ولا جايز تطلع حماتى ملاك ..ولا حاجة

وبم انى فى امتحانات الوقتى ومعمة الامتحانات ...محتاجكم جنبى
رجالة وستات وبنات وشباب واطفال وشيوخ
والستات خلاص حقكوا عليا...انا اللى غلطان ..
الستات عقلهم كبيييييييير..يالا محدش واخد منها حاجة
مش تسنيج ولا حاجة ولا يخطر على بالك كدة خالص

والنهاردة جيبلكم شخبطة من شخابيطى
على ماتفرج ...تشوفوهم وتقولو رأيكم

قعدوا شوفوها كل يوم بقى...وان شاء الله على ما نخلص الامتحانات....يعنى قدامك لنص الشهر كدة
وبعدين ربنا يسهلها
وبعتذر لانى مش برد عند حد لانى مشغووووول اوى فى الامتحانات

استنووووووووووووواااااااااا

وان شاء الله نتقابل فى الاجازة

فاصل ونواصل

الرجالة عقلهم كبير

الرجالة عقلهم كبيييييييييييير

تصدق بجد كدة..الموضوع دة اكتشفتة لسة قريب..ان الرجالة عقلهم كبير..انا مش بقول الكلام علشان اعمل فتنة نسوانجية ولا حاجة والله

بس بجد الرجالة عقلهم كبير..رغم انى مقتنع ان فى نساء كتير عقلهم بمية راجل(يعنى حوالى طن ونص) بس انا قولت اجيب التاريخ من الاول كدة لقيت ان الراجل متساوى مع الست فى كل حاجة ..وان مفيش تفرقة بينهم ..بس فى شوية مشاكل كدة حرمت البنات من شوية حاجات ..زى التعليم وغيرة..بس الحمد لله الرجالة سعت لانها ترجع للستات حقها ..واول واحد هو رفاعة الطهطاوى..لما رجع من برة ..طالب بتعليم المرأة

وانها متساوية مع الراجل فى التعليم

لكن جات على دماغنا احنا ..وبنعيط الوقتى بدل الدموع دم ..علشان هما اتعلموا ...اتعلموا علشان يتفتحوا كدة ويبقوا تمام ...ازدادوا جهلا اكثر..

المهم..البنات بقت بتتعلم زى الولد ..علشان تطلع منهم واحدة ممرضة وطبيبة ..وحاجة تفرح كدة تنفع المجتمع

فعلا طلع منهم ناس كدة ونفعوا المجتمع لكن فى المقابل

طلع ناس جاهلة كتير ..ودى سبب مشاكلنا الوقتى

بدأوا الستات يجتمعوا مع بعض(ويعنى على الستات بقى لما يجتمعوا مع بعض )وعملوا المجلس القومى للمرأة والمجلس النسوى..كل دة علشان يطالبوا بحقوق مش بتاعتهم ..اصلا

وكل دة والرجالة ساكتة ومبتقولش حاجة..راحوا فى ثورة 1919وقلعوا هدومهم علشان يبقوا زى الراجل..اشمعنى الراجل يعنى ماشى قالع راسة ..احنا كمان لازم نقلع راسنا..مساواة برضة

بعد كدة عملوا منظمات ودنيا وبدأوا يطالبوا بحقهم فى كل حاجة الراجل بياخددها ..يعنى مثلا ..الراجل بيشتغل يبقى البنت لازم تشتغل .حتى لو هتقصر فى بيتها وتربية ولا دها المهم تبقى زى الراجل وبس..الراجل بياخد ضعف الميراث ..لا ازاى البنت لازم تاخد زية متاخدش نصة ..الراجل ميتجوزش اكتر من واحدة ..دا انا سمعت واحدة بتقول لشيخ هو الراجل بيتجوز اربعة ..اشمعنى البنت متتجوزش اربعة ...((لا تعليق))

الستات خدوا حقوقهم واكتر من حقوقهم ولسة بيطلبوا حقوق كمان ...وهيفضلوا يطلبوا حقوق..والموضوع دة طبعا لانهم عندهم نقص ..فى شخصيتهم..والنقص دة عمرة ما هيروح هيفضل موجود عندهم على طول ..لانهم بقوا زى الراجل فى كل حاجة الا فى حاجة واحدة بس وهى ان عقلهم مش كبير زى الرجالة ...الرجالة مكبرين دماغمهم ..من التفهات دى..دا الحق يقال ..ان الراجل هو اللى مفروض يطالب بحقوقة دلوقتى..حقوقة اللى مسلوبة منة

بس احنا علشان عقلنا كبير ..مبنبصش للكلام الفاضى دة

ونفسنا كل ست يبقى عقلها كبير.

الموضوع دة للستات اللى عقلهم صغير فقط..اللى عندهم نقص وحاسين ان كل حاجة متاخدة منهم ...واكيد فى ستات عقلهم كبير ..كتييير.