تاااااااااااااج...اخيرا

وزع ورق الاسئلة

وزع ورق الاجابة 

وزع الاجابة

وزع 7 جنية لكل واحد

وزع الغداااا

دى تأثيرات من الامتحانات....وشكلها كدة هيبقى فى مضاعفات ..ربنا يستر

اول تاج يدخل المدونة ..من يوم ما عملتها....

التاج دة جالى من اتنين 

1-بنت ابيها

2-Soul.o0o.Whisper

تسلمولى على الهدية الجميلة دى

من أنت ؟

انا ....انا ..انا ..انا مش عارفنى ....انا مش انا ...انا مصطفى

وما الذى تفعله هنا؟
طيب لية الاحراج دة بقى

بعمل زى ما الناس بيعملوا

بحل التاج

إسرائيل تقصف كل جنوب ممكن بحثا عنك ، أى شمال ستقصد؟ .

هقصد مصر طبعا...فمصر خالة الدنيا

أنت مكلف بحذف حرف من حروف اللغة العربية .. أيها ستختار ولماذا ؟
انا اللى هحذف من اللغة العربية ...لية

دا العربى بتاعى مكسر

لو قدر لك أن تدخل السجن فما هي القضية التي تتمنى ان تدخل بها إليه؟

سجن ...يانهار ابيض..شكلى على اخر التاج دة هروح المعتقل ولا اية

بس لو دخلت يبقى اروح ازور واحد ..بس لو حلفوا عليا ان ادخل بقى خلاص

مش هدخل برضة.

بالمناسبة.. منذ متى اكتشفت نفسك؟

يظل الانسان كل يوم ..يبحث عن نفسة ...فيظل يجمع من نفسة اشياء ..حتى اخر رمق فى حياتة ...(حلوة رمق دى)

على مفترق طريق لافتتان ، اليمنى تقول ( إلى حلمك ) واليسرى تقول : ( إلى مالم يحلم به البشر ) ، أي الطرق ستسلك ؟

سأذهب الى حلمى الذى لم يحلم بة البشر

نحن لا نعيش حياتنا بل نتعلم فيها كيف نعيش ما تعليقك؟

نحن نتلعم كيف نعيش حتى نستطيع ان نعيش

بجملة واحدة فقط أكتب تعريفاً لكل كلمة من الكلمات التالية:

الوطن

هو المكان الذى يشتاق الية قلبى

الأم
هى كل شئ فى الوجود

الليل

هدوء..سكون..راحة

الحب

هى اسمى ئ فى الانسان ..لمن يفهمة

أمريكا

اكبر واعظم وارخم دولة شوفتها

المرأة

جوهرة ثمينة ...لمن تريد ان تكون كذلك

الصمت

الصمت فكر ..تدبر...عمق
الانترنت

المفيد المضر

أخترمنصباً واتخذ قرارا ؟

وزير الاقتصاد

وضع نظام اقتصادى جديد قائم على الشريعة الاسلامية

قيس، عنترة، جميل، هم الذين يقولون شعرا، وليلى وعبلة وعزة «صموت» لماذا هذا التغييب للمرأة؟

اصل بصراحة هما كانوا بيتقولا عليهم ....

بس بسم الله ماشاء الله ..الوقتى معدش صموت...واصبحت نانسى وهيفا موجودين الوقتى...ملهومش حجة

إلى أين تمضي كلمات الحب .. بعد أن نقولها؟

تمضى الكلمات الى الاذان .... ولكن تمضى المشاعر اللى الاحساس

هل تجد علاقة بشكل أو بآخر بين المرأة وقطاع الطرق ؟

طبعا...وعلا قة وطيدة كمان

فقطاع الطرق يطلق عليهم اسم الشطار....

والمرأة يطلق عليها الشاطرة ...اللى تعرف توقعلها عريس الوقتى

هذا فراق بيني وبينك .. متى ولمن تقولها ؟

لا اقولها لأحد ...فأنا لا احب القطيعة بتاتا

كيف هو غداً ؟

الغد عند الانسان ...امل

الغد عندى ..الخميس

امرر التاج للممرش علية

بلاد السحر والخيال – محمد عبدالرحمن

ومضات – د: ياسر عبدالفتاح
تخاريف ايوشة – ايوشة

 Gogo!sf 

قرار من العبد لله..المدنة هتشتغل بنظام شبة يومى ...يعنى هقرفكم كل شوية 

استحملوا بقى ..الاجازة جت على دماغكم بقى

وانا بكلم اوباما

رغم إنى قولتلة .. خلاص الموضوع خلص..بس هو برضة مفيش فايدة فية.

هقولكوا الحكاية ..انا لما عرفت ان أوباما هيتكلم عن حقوق المرأة ..زى ما قولتلكم فى البوست اللى فات..أمُت جاى عامل حركة مجدعة ..أول ما جة اوباما مصر وشغل خط الاتصالات بتاعة ...قمت متصل بية (مع ان الدقيقة ب40 قرش)قطمة وسط يعنى ..بس اتشجعت واتصلت..والمكالمة كان شكلها كدة.

 الصورة اللى فوق مش انا...دا واحد تانى..والتانية وهو بيكلمنى

مصطفى: أوباما ..حبيب هارتى

أوباما:تمام الحمد لله ...ممكن اعرف مين معايا

مصطفى: بقى مش عارفنى ياراجل...دا انا كدة هزعل

أوباما:لا والله معلش اصل ..الارقام على الشريحة التانية ..ومش واخد بالى من الصوت

مصطفى:ماشى يارايس..كبرت علينا بقى..انا مصطفى بتاع مدونة فك زنقة

أوباما:ااة..مصطفى ....ازيك يا مصطفى وحشتنى ووحشنى موضوعيك الحلوة..انت فين يابنى من زمان

مصطفى :انا موجود ..بس انت اللى نسيتنى..بقولك اية علشان معطلكش ..وانا عارف انت جاى 8 ساعات بس..فاكر موضوع الرجالة عقلهم كبير

أوباما:ايوة..صحيح انا كنت هرد عليك فى الخطاب بتاعى النهاردة على الموضوع دة ...انت عايز تودينا فى داهية.

مصطفى ..اسمع بس..انا بعدها نزلت موضوع اسمة الستات عقلها كبير..واعتذرت فية ياعم..وخلاص بقينا اخر تمام..والحريم كلهم انبسطوا منى ...والموضوع انتهى...فمفيش داعى تعمل قلق بقى وضجة ...علشان هتخلع من هنا ..وانا هترمى فى المعتقلات من هنا.

أوباما:ياخبر لية ياراجل..بس الخطاب اتكتب خلاص ...على العموم انا مش هجيب اسمك انا هتكلم عن الموضوع بشكل عام ..ومش هجيب سيرتك خالص..كدة قشطة

مصطفى :خلاص قشطة...وابقى سلملى على هلارى

أوباما..اية احنا مش هنشوفك فى المؤتمر ولا اية

مصطفى:لا ياسيدى مجاليش دعوة ..وبعدين انا لسة هسافر..على العموم انا هشوفك من التليفزيون

أوباما:ماشى يادرش ..مع انى كنت عايز اشوفك بس يالا خير

مصطفى:المرة الجاية بقى...سلامووووووووز

أوباما :سلاموووووووز

وانتهى الحوار لغاية كدة ... وقفل السكة ..واحد حدق يجى يقولى "هو اوباما بيتكلم عربى"..هقولة ياحدق..دى الترجمة بتاعة المكالمة .

هانت اهى لسة اسبوع واخلص وافضاللكم بقى..والمرة الجاية جايلى اول تاج فى حياتى هجوبكم علية ان شاء الله

الستات عقلها كبير+خبرعاجل

خبر عاجل....انطلقت الان مجلة ميكانو ..وتم نشر موضوع "نيو حرامى" بتاعى..اقرأوا وقولوا رأيكم

بعد التهديدات اللى جأت ليا...والمواجهات والمصارعات اللى وجهتها...وبيقولوا ان cia دخلوا مصر
واوباما جاى يتكلم مصر مخصوص علشان يتكلم عن الموضوع دة
وغوانتنموا شكلها هيفتحوها تانى. مخصوص علشانى
واخذأ بمدأ" الحيطة والجزر"
وبعد كمان م قرأت ان واحدة قتلت جوزها..علشان بتحب جوز خالتها..(مش عارف خالتها دى اونطة ولا اية)
والروح النسأئية العدائية فى المجتمع
صدق القائل
"اتقى شر الحريم اذا غضبوا"

انا بوجة كلامى لكل اللى شايل منى فاكرنى معادى للسامية ..ومن الذين ضيعوا حقوق المرأة ..فى المجتمع
والموضوع جايز يوصل لجميعية حقوق الانسان فى العالم
وبصراحة انا خايف على حماتى..قصدى حياتى
هخاف على حماتى لية بس..انا خايف على حياتى
ولا جايز تطلع حماتى ملاك ..ولا حاجة

وبم انى فى امتحانات الوقتى ومعمة الامتحانات ...محتاجكم جنبى
رجالة وستات وبنات وشباب واطفال وشيوخ
والستات خلاص حقكوا عليا...انا اللى غلطان ..
الستات عقلهم كبيييييييير..يالا محدش واخد منها حاجة
مش تسنيج ولا حاجة ولا يخطر على بالك كدة خالص

والنهاردة جيبلكم شخبطة من شخابيطى
على ماتفرج ...تشوفوهم وتقولو رأيكم

قعدوا شوفوها كل يوم بقى...وان شاء الله على ما نخلص الامتحانات....يعنى قدامك لنص الشهر كدة
وبعدين ربنا يسهلها
وبعتذر لانى مش برد عند حد لانى مشغووووول اوى فى الامتحانات

استنووووووووووووواااااااااا

وان شاء الله نتقابل فى الاجازة

فاصل ونواصل

الرجالة عقلهم كبير

الرجالة عقلهم كبيييييييييييير

تصدق بجد كدة..الموضوع دة اكتشفتة لسة قريب..ان الرجالة عقلهم كبير..انا مش بقول الكلام علشان اعمل فتنة نسوانجية ولا حاجة والله

بس بجد الرجالة عقلهم كبير..رغم انى مقتنع ان فى نساء كتير عقلهم بمية راجل(يعنى حوالى طن ونص) بس انا قولت اجيب التاريخ من الاول كدة لقيت ان الراجل متساوى مع الست فى كل حاجة ..وان مفيش تفرقة بينهم ..بس فى شوية مشاكل كدة حرمت البنات من شوية حاجات ..زى التعليم وغيرة..بس الحمد لله الرجالة سعت لانها ترجع للستات حقها ..واول واحد هو رفاعة الطهطاوى..لما رجع من برة ..طالب بتعليم المرأة

وانها متساوية مع الراجل فى التعليم

لكن جات على دماغنا احنا ..وبنعيط الوقتى بدل الدموع دم ..علشان هما اتعلموا ...اتعلموا علشان يتفتحوا كدة ويبقوا تمام ...ازدادوا جهلا اكثر..

المهم..البنات بقت بتتعلم زى الولد ..علشان تطلع منهم واحدة ممرضة وطبيبة ..وحاجة تفرح كدة تنفع المجتمع

فعلا طلع منهم ناس كدة ونفعوا المجتمع لكن فى المقابل

طلع ناس جاهلة كتير ..ودى سبب مشاكلنا الوقتى

بدأوا الستات يجتمعوا مع بعض(ويعنى على الستات بقى لما يجتمعوا مع بعض )وعملوا المجلس القومى للمرأة والمجلس النسوى..كل دة علشان يطالبوا بحقوق مش بتاعتهم ..اصلا

وكل دة والرجالة ساكتة ومبتقولش حاجة..راحوا فى ثورة 1919وقلعوا هدومهم علشان يبقوا زى الراجل..اشمعنى الراجل يعنى ماشى قالع راسة ..احنا كمان لازم نقلع راسنا..مساواة برضة

بعد كدة عملوا منظمات ودنيا وبدأوا يطالبوا بحقهم فى كل حاجة الراجل بياخددها ..يعنى مثلا ..الراجل بيشتغل يبقى البنت لازم تشتغل .حتى لو هتقصر فى بيتها وتربية ولا دها المهم تبقى زى الراجل وبس..الراجل بياخد ضعف الميراث ..لا ازاى البنت لازم تاخد زية متاخدش نصة ..الراجل ميتجوزش اكتر من واحدة ..دا انا سمعت واحدة بتقول لشيخ هو الراجل بيتجوز اربعة ..اشمعنى البنت متتجوزش اربعة ...((لا تعليق))

الستات خدوا حقوقهم واكتر من حقوقهم ولسة بيطلبوا حقوق كمان ...وهيفضلوا يطلبوا حقوق..والموضوع دة طبعا لانهم عندهم نقص ..فى شخصيتهم..والنقص دة عمرة ما هيروح هيفضل موجود عندهم على طول ..لانهم بقوا زى الراجل فى كل حاجة الا فى حاجة واحدة بس وهى ان عقلهم مش كبير زى الرجالة ...الرجالة مكبرين دماغمهم ..من التفهات دى..دا الحق يقال ..ان الراجل هو اللى مفروض يطالب بحقوقة دلوقتى..حقوقة اللى مسلوبة منة

بس احنا علشان عقلنا كبير ..مبنبصش للكلام الفاضى دة

ونفسنا كل ست يبقى عقلها كبير.

الموضوع دة للستات اللى عقلهم صغير فقط..اللى عندهم نقص وحاسين ان كل حاجة متاخدة منهم ...واكيد فى ستات عقلهم كبير ..كتييير.

الشاطر حسن جة مصر

اسمر وبأستك
وبأصة من تحت ...اوعى تفهم
صح..دة عمك ياض داالشاطر حسن بتاع الجعير فى لبنان...طبعا انت بتسأل هو حج
ولا لسة ..الصرحة انا معرفش بس انت لو عرفت ابقى اقولى .

طبعا دة غنى
عن التعريف دا الصغير الكبير والرجالة والحريم وكلة عارفينة ...لانة كل
شوية ناطت فى قناة واقعد يجعر ويزعق ..وعملك حمش اوى ...وهو اللى بيدافع
عن العرب والمسلمين ..وهو حامى حمى المقشة..وحاجات كدة لغاية مابان على
حقيقتة ..مع ان حقيقتة معروفة من زمان بس اهوة....هتعمل اية ...نشوف بقى
اية اللى هو عملة ..وهو مين بالظبط.
هو دة...................>>


الشاطر
حسن ....دة شيعى رافضى ..هتقولى بتفرق لية بين الشيعة والسنة ياعم
الحاج..هقولك افرق لما يكونوا هما اعداء لينا ...او لما هما يفرقوا الاول
...الشيعة الرافضية دول بقى من الجانب الاسلامى هما بيكفروا كل الصحابة
الا ستة بس وعلى راسهم ابو بكر وعمر وعثمان ..وكمان السيدة عائشة احب
الناس الى النبى ....وكمان ابوهريرة اللى بيحمل اكتر عدد من الاحاديث عن
النبى صلى الله علية وسلم
وفى عقيدتهم انهم المفروض يشيلوا السنة دول
من على وجهة الارض..وانهم اعدائنا قبل الكفرة واليهود ....وبيسعو ا لنشر
الاعتقاد الشيغى بين المسلمين السنة ..وبيصفرفوا على كدة ثًلث الدخل
الأيرانى ..دخلوا دول كتير جدا زى لبنان ..مكان الشاطر حسن ..واللى عميلك
حزب الله ...وكاتب على الشعار بتاعة "الا ان حزب الله هم الغالبون"..هو
فاكر نفسة هو اللى مقصود بالاية ..والاية بريئة منة ليوم الدين ..ودلوقتى
هما بيحاولوا يدخلو اهم بلد ..وهما لو انتشروا فيها ..هيهصوا..وهى بلدنا
مصر...وقولكوا بيدخلوا ازاى.

ركز معايا ...فى حرب غزة الاخيرة بدأ
الشاطر حسن يزعق وينطر وهضرب وهضرب واوعى حد يحوشنى وسيبنى عليهم
..والكلام دة ..وطبعا الوحد مشفش منة صاروخ لعبة بلاستيك ...وفى وسط زعيقة
اقعد يهزق مصر ..ويقولها افتحى المعبر ..واعملى مش عارف اية ..على اساس
انة هو اللى هيتحكم فينا..وهو اللى هيخلى مصر على مزاجة ..تفتح المعبر ولا
تقفلة ...دا انا لوكنت رئيس الجمهورية وهو قالى كدة ...كنت هافتح نفوخة
الاول وبعدين افتح المعبر...دى اول حاجة.

لو قعدنا تكلم عن
المخالفات العقائدية والديني ..مش هنخلص ..يعنى التقريب بينا وبينهم
مستحيل من النحية العقائدية والفقهية..لجماعة اللى بينادوا للتقريب..واللى
يرد على كدة مش احنا دا المشايخ والعلماء..وتكم فى كدة ناس كتير جدا
..علماء ازهر..وعلماء اخرون كثر..واهم واحد فيهم الشيخ القرضاوى..بعد ما
قعد عشرين سنة فى عملية التقارب ..قال انة لا يمكن التقارب بينهم وحذر من
التبشير الشيعى ..فى المجتماعات السنية ..واللى مش مصدق يكتب قى جوجل "رد
القرضاوى على الشيعة"..واعرف ياسيدى.

دا كمان ..فى مواقع
ليهم..يقولوا فيهم انهم اهل السنة ..والموقع كلة عن التكفير
والتفسيق..ففسقوا معظم علماء السنة مثل القرضاوى وعمرو خالد والالبانى
وعلماء كثر.
وعيب اوى لما نقف مع الشيعة ضد مصر ...حتى لو احنا مع خلاف
بين الحكم وبينا... بالبلدى"انا واخويا
على ابن عمى وانا وبن عمى على الغريب"...مصر بلدنا لازم نحافظ عليها
..ونعرف مين عدونا من مين حبيبنا.

بجد مصر استحملت الكثير...كفاية بقى هنلاقيها من الخنازير وانفلونزتها..ولا البنى ادمين الخنازير...من كل مكان خنازير ...

البوست فية انفلونزا..اوعى تخش+تحديث

تحديث:موضوع الانسان اصلة ورقة مع بعض التعديلات فية على مجلة وسط البلد عايزين نشوف رأيكم .

طيور...خنازير..حمير ..معيز
الحيوانات كلها اتلمت علينا...حاجة غريبة جدا ..بقينا ملطشة لك حيوان..كل حيوان من دة يعطس شوية
البلد تتقلب ..والناس تموت ..كل دة علشان حيوان
اللى يضايقك اية بقى يا اخى....ان الخنزير عايز يتعالج على نفقة الدولة ..لية فاكر نفسة مين ..ابو الهول
دا ابو الهول حتى منخيرة اتقطعت ..متعالجتش على نفقة الدولة ..ما علينا
سمعت اخر خبر ..بيقولك هيعدموا كل الخنازير اللى فى مصر ....يالا ابسط ياعم ..هتموت وتستريح من السواد اللى انت عايش فية دة
لا ومش بس كدة واحد طالع يقولك ان الخنزير المصرى احسن سلالة فى العالم..مش فاهم انا الموضوع دة
يعنى هيجيلة انفلونزا نضيفة ولا حاجة ...ما الخنازير كلها بوش ومنخير طالعة لقدام وشكلة اعوذ بالله
ولا يمكن قصدة على بمبة ..اللى بيجى مع تيمون ياعم فى هاكونا مطاطة
اللى عاملينك فية الخنزير طيب وهو الصح دايما ..وهو اللى طيب وابن حلال دايما
ولا الاخوة المسيحين اللى طالعين فى مظاهرات علشان ميدبحوش الخنازير ..ومقدمين طلب للريس والبابا شنودة بكدة
خلاص ومالة هما يكلوا لحمة خنازير...والناس تموت مش مشكلة .
دى اهم الاخبار بس...
بس انا ملاحظ حاجة غريبة اوى ان مصر بتحضن اى حاجة فى العالم ...شغالة حضانة يعنى
يعنى انفلونزا الطيور..تقولك ماشى هات هنا اما نجربها على الشعب المصرى الاول ...جايز يطير ولا حاجة
بعدها ازمة اقتصادية ..برضة مسبنهاش ...قولنلها
ولله لانتى جاية عندنا يعنى انتى هتعدى من جنبان ومتجيش دا عمرة ما يحصل
تعالى بس اشربى حتى كباية شاى..لا ومش عزومة مراكبية ..عزومة بحرارة
اخر حاجة انفلونازا الخنازير...هى لسة مصر مستضافتهاش بس يارب ماتيجى يارب
ولا يتعزم عليها بحاجة

اة صحيح ....خبر عاجل ...ممنوع ركوب عربية مرسيدس خنزيرة ..لانها ممكن تكون حاملة فى المرض
ومش عارفين هى هتولد امتى.

البلد عايزة مصلحتك

انا عارف اتأخرت عليكم بس هعمل اية يعنى ...كنت بسيق الكمبيوتر وانضفة كدة ..بقالى كام يوم
شغال فية ..اشيل فيرس الاقى التانى ..بس هنعمل اية بقى ..قدرى ..اسخط يعنى
الاول كل سنة وانت طيب ياريس....كام سنة الوقتى..80 سنة...ويارب السنة اللى جاية نشوفك فى الحجاز ..

كل يوم بنسمع مشاكل وحاجات بتحص فى البلد ....الكل فاكر أن الدولة باظت طبعا لا لان الدولة بتعمل كدة علشان عاوز مصلحتك
الجديد بقى ان الدولة هى اللى عاملة بطالة ...هتسألنى طبعايعنى هى اللى قصدة ..هقولك طبعا... لانها عاوزة مصلحتك..أزاى ؟؟؟ هقولك انا لان الدولة مش عاوزة تتعب الشباب ... يعنى ترضى ان انت تفضل تعبان طول اليوم شغل وارهاق وبهدلة ...هى الدولة هتتعبك ازاى يعنى ...دة روحة فيك... الدولة عاوزاك تنام وتستريح وتصحى بدرى علشان تنام تانى ...انت اهم حاجة تاكل وتشرب وتنام وتدخل الـ.... وبس وتنزل فى السهرة تقعد على القهوة ...ودة كمان علشان القهاوى تشتغل يعنى بذمتك لو الشباب كلة اشتغل مين اللى هيعقد على القهاوى ..وتتقفل وكدة هيقطع عيش القهوجى ... ودة طبعا حرااام ..طبعا الدولة والحكومة بتحب شعبها
وهى كدة ضربت حجرين بشيشة ريحتك وشغلت القهاوى.

لا ومش بس كدة دا بتاخد منك الضرائب لمصلحتك برضة ...هتقولى طبعا الضرائب ..وعايزة مصلحتك هقولك طبعا
هى مش بتاخد منك الفلوس علشان تصرفها عليك علشان انت مش هتعرف تصرفها كويس ..ممكن تبعترها فى اى حاجة ..تفتح مشروع ولا حاجة لا قدر الله ...فهم خدوها علشان بستثمرهولك...وتصرفها عليك ...انا عارف ان انت هتقولى بتصرفها عليا فين هقولك انت عندك حق.. بس هى برضة بتعمل لمصلحتك..الدولة عينهالك علشان الورثة..مش هى لازم تأمن مستقبل الجيل اللى مش جاى قصدى اللى جاى ........

الدولة مش عارفة تعمل اية علشان تريحك يعنى عليها والله بتتعب جدا ...ياراجل دا باعت اللى قدمها واللى وراها ..لدرجة انها بقت على الحديدة..كل دة لية.. علشان تتمتع انت وتاكل عيش ابو شلن وتنبسط..لا ومش بس كدة دة استغلت ان الحديد غلى وباعت الحديدة...مش عارف نودى جمايل الحكومة دى فين ربنا يخليلنا الحكومة...شوفت الحكومة بتتعب ازاى...كل دة علشان عاوز مصلحتك

دا يما ظلمين البلد كدة

احترموا نفسكم

كل ما اروح مكان ولا اشغل التليفزيون الاقى واحد طالع وواحدة وقاعدين يتكلموا عن قضية مهمة جدا هى التحرش
وطبعا يعينى الراجل اللى غلطان ولا الست...وفى التليفزيون نسمع الاراء.

معانا اتصال تليفونى ونقول الووووووووووووووو

فتحى(شاب): الو..مساء الخير ..انا احب اتكلم فى الموضوع دة بصراحة..الشاب بصراحة مظلوم ..يعنى احنا نعمل اية ياجماعة واحدة ماشية لابسة من غير هدوم ..وانا احاسيسى ومشاعيرى بتطلع بقى وانا الصراحة مبعرفش امسك مشاعيرى ..هما يعنى لازم يلبسوا ضيق ومحزق ويتعبونا معاهم ..احنا شباب مش عارف يتجوز يعمل اية بقى ..بيسلى نفسة بدل ماهو قاعد ملوش لا شغلة ولا مشغلة ..يعنى يافندم انا ببقى قاعد فى أمانة الله على القهوة ..لقيت واحدة معدية لابسة مش عارف اية واية ..ومش عاملة احترام ليا وانا قاعد..أسكت يعنى ..لازم اعمل اى حاجة اهى حتى لو حد سألنى اقولة انى لقيت شغل ..الوقتى بعاكس ..اترقى شوية ابقى متحرش...لغاية ماابقى رئيس المتحرشين فى المنطقة..وبعدين ياباشا احنا بنعمل كدة لمصلحتهم..البنت من دول لما تقعد تتعاكس ويتحرش بها ..وكدة تروح تلم نفسها وتلبس محترم

طيب دلوقتى البنت بتبقى لبسة محترم وبيتحرش بها هى كمان؟؟

فتحى(نفس الشاب):لالالالا...حد الله بينى وبين الحرام ..البنت المحترمة تمشى ..عمرى ما اعكسها..دى زى اختى (على اساس التانية بنت عمة )واللى مرضهوش على اختى مرضهوش على غيرى

طيب معانا اتصال من فتحية ونقول الوووووووووووو

فتحية (فتاه):لوسمحت احب اقول حاجة ..ان الموضوع انتشر جدا ..وبقت حاجة تخنق جدا ..الواحدة تبقى ماشية تلاقى واحد بيتحرش بها..احنا عملنا للموضوع دة بعض التسهيلات شوية ..علشان يبطلوا ومفيش فايدة ..يعنى هما يبصوا ..وقولنا الواحد يبص باحترامة وكمان عملنا خاصية جديدة انة ممكن يضيف تعليق يعنى يقول ياقمر ..ياعسل ..(فاكرة نفسها مدونة)واحنا عملنا الموضوع دة لانة بيرفع من روح البنت"المعدنية" يعنى دلوقتى ممكن يبص ويقول تعليق..نعملهم اية تانى ..بس تِعملى اية عالم مبيعجبهاش العجب ولا الصيام فى رجب ...وهما لو تمادوا فى الموضوع دة شوية كمان هنلغى كل الخصيات الموجودة

طيب بيقولك انة اللى لابسة لبس مش محترم هما اللى بيتحرشوا بيها؟؟

فتحية(فتاة):لو سمحت اللبس دة حرية شخصية ..يعنى كل واحدة تلبس اللى هى عايزاة ..احنا مش فى عصر الحرية والديمقراطية ولا اية ..وبعدين اللبس لة تأثير فسيولجى عند البنت ...مهم برة بيلبسوا اللى هما عايزينة..اشمعنى احنا يعنى.

كل الكلام دة بنسمعة فى كل مكان..وفى كل برنامج بيذيع الموضوع دة ..الكل بيقول التانى هو اللى غلطان
بس قبل ما اقول اى حاجة ..عايز اقول ان نسبة التحرش فى الولايات المتحدة اكبر من مصر اضعاف مضاعفة ..علشان عقدة الخواجة اللى عندنا

انا بقى لو قلت رأيى هقول ان اللى الاتنين غلطانين ..والغلط لابسهم من ساسهم لراسهم ..لية بقى ؟؟


بالنسبة للشاب ...ملوش اى حق انة يتحرش ببنت حتى لو لابسة اية ..ويتحكم فى نفسة ..امال راجل لية ..دا الرجال قوامون
عيب اوى لما تبقى شحط طويل عريض ومتعرفش تتحكم فى نفسك ..ياعم اعتبرها اختك وعملت حاجة غلط تنصحها ولا تعمل انت كمان حاجاة غلط زيها..بدل ماتصونها وتحفظها وتراعيها ..انت اللى تتحرش بيها.

والبنت غلطانة فى لبسها ومتقوليش هى حرة فى لبسها لان كل حرية وليها حدود مفيش حاجة اسمها حرية مطلقة..فهى لم تحترم حرمة الشارع اللى هى ماشية فية ...وعايز تمشى فى الشارع كأن مفيش حد فى الشارع غيرها..انتى محترمتيش الشارع ولا الناس اللى فية فمتنتظريش من اللى فى الشارع انهم يحترموها ...انا مش عارف اية المشكلة لو البنت مشت باحترامها..لابسة لبس محترم...زى الناس الكويسين ..هيمشوا ينادوا عليها ويقولولها يا محترمة ..جايز بقت شتيمة اليومين دول ..وانا مش عارف..هتنقصى رجل ولا ايد

يعنى انا من وجهة نظرى ان الاتنين المفروض يتحاكموا ..مش واحد بس ..لان الاتنين عملوا غلط ..المفروض يتحاكموا علية
لان الشاب :لم يحترم خصوصية البنت اللى ماشية .
والبنت :لم تحترمة حرمة الشارع اللى هى ماشية فية .

وارجع واقول تانى ..ان مشكلتنا الحقيقية ...ان احنا لما نيجى نحل مشكلة نبصلة من جهة وحدة بس ونهمل الجوانب الاخرى ..احنا بنعمل المشاكل ونرجع نحل فيها

مبرووووووك ..فى واحد اتجوز

مبرووووووووووووك فى واحد اتجواز ..لولىلىلىلىلىل..اكيد مش انا طبعا ..والا مكنتش قعدت ماعكوا الوقتى واتكلمت معاكوا ..بس اللى انا متاكد منة انة اكيد فى واحد اتجوز ..واللى اتجوز اهوة...


ندخل فى الموضوع:-
ياااااة ..اخيرا ..دة بقى اخر موضوع فى الجواز..مش عارف الجواز مشكلة فى كل حاجة حتى فى مواضيعها ..بس هنعمل اية بقى لازم نتكلم..كنا اتكلمنا للبنت انها لو عايزة تتجوز تعلم اية..فى ناس اعترضت على الكلام وفى ناس وافقت ..نحن نرحب بالاثنين ..ديمقراطية بقى..هنعمل اية

قبل ما نتكلم عن حاجة بقى لازم نقول حاجة مهمة فى ناس كتييير متعرفهاش"ان نسبة الجواز اكبر بكتير فى طبقة الفقراء عنها فى طبقة الاغنياء" ودة ان دل يدل على ان المشكلة الوقتى مش مشكلة فلوس بس ولا شباب ولا بنات ..دى ازمة الكل مشارك فيها سواء شباب او بنات او مجتمع
لا الفقر لة دعوة بالجواز ..ولا الغنى لة دعوة بالجواز.. بس لو لحظنا نسبة العنوسة عند البنات وعدم الجواز عند الشباب هنلقيها كتييييير جدا فى الطبقة المتوسطة ...واحنا يمكن قولنا بعض الاسباب فى الجزء اللى فات "الثالث يعنى" بس تعالى نشوف الحل من عند الشباب يبقى ازاى

هقولك ياعم الحلول اهوة..إبسط ياعم
1-عايز تتجوز بجد؟؟: لو فعلا عايز تتجوز قولها من قلبك يعنى انوى نية صادقة انك عايز تتجوز فعلا مش كلمة بتتسلى بيها وخد بالاسباب اللى توصلك لكدة متوقليش الوقتى بطالة ولا مهور واسمع كلامى للاخر اللى عايز يوصل لحاجة هيوصلها بس لو خد بالاسباب وتوكل على الله ..مش تواكل ..انت اعمل بس اللى عليك وسيب الباقى على ربنا..وطبعا ربنا هيفتحها قدامك بس انت لو صدقت النية مع الله

2-بص للتنفعك:الوصية اللى وصاها لينا النبى للشباب وللبنات يعنى دور على البنت المحترمة اللى على خلق ودين مش بالضرورى تبقى ملكة جمال الكون ..يعنى واحدة مقبولة الشكل ..وطبعا كلنا حافظين حديث النبى .."تنكح المرأة لاربع لجمالها ولمالها وحسبها ونسبها ولدينها فاذفر بذات الدين تربت يداك"يعنى اختار اللى عندها دين لانها هى اللى هتقدر تحافظ على بيتك وعلى ولادك وتربيها تربية كويسة ..وانت تعرف بجد انت لو صدقت النية فى انك تلاقى واحدة لدينها هيتوافر فيها الثلاثة التانين بس اهم حاجة برضة تصفى نيتك.

3-متلعبش كتير:يعنى متتبعش نظام "قضيها الناس لبعضيها" ..يعنى متقعدش تلعب ببنات الناس وحب و مش عارف اية ..علشان كما تدين تدان..يعنى هتعمل كويس هتلاقية ..هتعمل وحش هتلاقية برضة ..

4-متفكرش كتير:احنا الوقتى علشان عندنا فراغ كتير فتلاقينا معظم تفكيرنا فى الجواز ..وعايز نتجوز وخلاص..لا فكر فى حاجت تانية كتير ..مستقبلك ..طموحاتك..حياتك..ازاى تظبهم الاول وبعدين الجواز لما ربنا يفتح عليك وتعرف تبقى مسؤل عن بيت وعن اسرة ..ابقى اتجوز..وبص للجواز بمميزاتة وعيوبة..علشان تعرف راسك من رجليك.

طب تعالى لأكبر مشكلة بتواجة الجواز....وهى المهور الغالية

كان من كام يوم سمعت ان فية حملة فى السعودية اسمها "خلوها تعنس" على وزن حملة "خلوها تصدى"للعربيات" عملوا واحدة للبنات يقولك لقما تقللوا المهور ياعم سيب بنتك قاعدة جنبكوا تعنس ..هو انا فعلا المهور والطلبات اللى موجودة دى لازم تنزل ..والطلبات الخرافية اللى الحموات بيطلبوها دى ..الا ان اسمها مينفعش كتعامل بشر على وجة الارض..بس فعلا حرااااااااااااااااام ياجماعة الكلام دة ..يعنى المهم عندك ان بنتك تعيش سعيدة ..فالسعادة عمرها مكانت فى الفلوس..واحنا قولنا قبل شروط العريس الكويس ..اللى يقدر يحافظ على بنتك ويصونها..علشان تعيش سعيدة ..وارضى بالقليل ..وارحموا الشباب شوية ..يعنى انتوا والحكومة ..علينا..دا حرااااااااااام

كنت عايز ابعت رسالة لحماتى "ياحماتى خليكى حلوة كدة وخليكى متساهلة فى عملية الماديات دى ..علشان ابنك يعرف يتجوز هو روخر..روحى ياشيخى ..ربنا يوقفلك ولاد الحلال فى الموقف ويقعدوكى اربعات ..خلاص بقى احنا هنشحت ولا اية"

كنا مرة بنسأل دكتور فى الجامعة بنقولة..اية هى مشكلتنا ..قال :ان احنا عندنا انفصام فى الشخصية .. يعنى زنقين نفسنا بين" العرف والعادات والتقاليد "وادى مثال ..قالك لو واحد راح يتقدم لعروسة ..فى الاول خالص قالوا يابنى احنا بنشترى راجل ..(عُرف)..وبعد ماتدخل وتتكلم وعايزين مش عارف اية واية واية وشروط ياما ..(عادات وتقاليد) طيب فى اية راجل وفى اية المطالب اللى بتطلبيهم دول

اخيرا وليس اخرا...انا اكتشفت حاجة مهمة جدا ..ان الحكومة هى اللى مخليا فيها بطالة ..تعرفوا لية ..واحنا صغيرين كانوا يبعلمونا فى العربى والجغرفيا وغيرة ..ان الجواز المبكر مينفعش ومضر ومش عارف اية ...والظاهر ان هما لقوا حلها ن يبقى فى بطالة فالواحد على مايتجوز يكون وصل 30 سنة ولا حاجة ويكونوا حلوا مشكلة الجواز المبكر..مع ان فى حاجة ..ان الجواز فى القرى يعتبر بدرى يعنى الواحد فى القرية ممكن يتجوز وهو عندة 21 سنة ولا حاجة وفى الصعيد كمان ..رغم الفقر اللى يمكن اكتر من الناس العادية الى حالتهم متوسطة ..او تعتبر احسن منهم ماديا .

بس الصراحة ان الموضوع مش حكاية بطالة ..ولكنها حكاية ثقافة مجتمع مش عارف هو عايز اية ..مش المفروض ان احنا نرمى حل المكلة على جانب واحد ونهمل كل الجوانب الاخرى ..ولكن كل واحد مننا مشارك فى عمل المشكلة .. والمشكلة الاكبر ان كل واحد بيرمى على غيرة السبب ..احنا بجد لو عايزين نتغير ..قبل مانغير الناس والمجتمع من حوالينا ..نبص لنفسنا ونشوف الحل من جوانا احنا..اكيد هنلاقى حل..سواء شاب اوبنت او أم او اب او اى احد فى المجتمع ..الكل يبحث جواة عن حل المشكلة من الحتة اللى هو فيها .

حل الجواز بإيجاز

بعد الموضوعين اللى قرأناهم اللى فاتو بتوع الجواز
نكمل بعد الحاجات الحلوة بقى ..نتصدم بالواقع دة

المشاكل اللى بتواجة الجواز

1- نسبة العنوسة فى مصر وصلت اللى 15 مليون عانس دول طبعا غير البنات اللى لسة معنسوش..ومتجوزوش وكمان قرات لسة النهاردة ان نصف عوانس مصر معاهم ماجيستير ودكتوراة

2- ان البنات ضعف عدد الرجالة يجى مرتين تلاتة

3-ان البطالة سبب من اسباب عدم شغل الشباب مما يؤدى الى عدم قدرتهم على الجواز

4-المهور العالية جدا اللى بيطلبها امهات البنات بالذات..وشقة على النيل..وشبكة مش عارف بكام الف دبور..والقايمة ومؤخر صداق دا غير الفرح يبقى فى قاعة 5 ستار ولازم ام كلثوم تيجى تغنى تقوليلها ياحاجة ام كلثوم ماتت تقولك مليش دعوة انا عايزها تغنى فى فرح بنتى

5-البنت مش عايزة تتجوز اى جوازة لازم الاول تقعد تحب واحد خمس ست سنين على مايفهموا بعض ويشوفوا ينفعوا يتخطبوا لبعض ولا لأوعمتا فى الاخر حد منهم يقول للتانى انا اكتشفت ان احنا مننفعش لبعض ...ياحبيبى ..لان تفكيرنا مش متوافق..مع بعضة ..وقاعدين خمس سنين يدرسوا بعض..عامل زى اللى رايح يشترى جوافة كل نص الجوافة اللى عند الراجل وفى الاخر قلة والله الجوافة مش عجبانى ياحاج

6-دا غير كمان الشاب برضة ..عايز يتجوز ملكة جمال الكون ويقعد يتنك على خلق الله بقى..اهم حاجة عندة البنت تبقى حلوة..دة اصلا لو عايز يتجوز ..بس لو بصينا بقى معظم الشباب الوقتى ..مبيحبش يتحمل مسؤلية حاجة ..لا بيت ولا اسرة ..وعايز يعيش حياتة

دى بس المشاكل العامة وباختصار شديد جدا..منها مشاكل بتخص البنات ومشاكل بتخص الشباب ومشاكل بتخص الحموات ومشاكل بتحصل من مجتمعنا من فقر وبطالة وغيرة...بس احنا قررنا ان احنا نحلها ولو حتى اللى نقدر نحل اللى فى ايدينا

حل للمشكلات اللى فاتت وهنقسمة ثلاثة اقسام ..

القسم الاول :من جانب البنات..البنات هيعملوا اية علشان نحل الموضوع دة

1-اختارى جوزك:اهم حاجة علشان تعيشى عيشة كويسة تختاز الزوج الكويس ..ودة تنقية ازاى زى ما قالنا رسولنا الكريم "اذا جائكم من ترضون دينة"يعنى تختارى الرجل اللى على دين لية ..لان اللى على دين هيبقى على خلق .هيقدر يحافظ عليكى وعلى اولادك ..هيسمع كلام النبى على الاقل .. ويستوصو بالنساء خيرا..مش لازم يعنى يبقى غنى ..وابن ناس..و الشروط الكتيييييييييير اوى.

2-بطلى صحوبية :نصيحة اخوية من اخوكى الصغير او الكبير اى حاجة..ميبقاش فى حياتك واحد تحبية غير واحد بس ..اللى هو زوجك بأذن الله ..وبلاش ترتبطى بحد قبل الجواز..حتى لو انتى متأكدة مية فى المية انة هيتجوزك ..لان بدل مفيش حاجة بتحكمكم ..متضمنانيش يتجوزيك..ومعظم الشباب بيقضى وقتة اليومين دول ..يعيش حياتة يومين فى الجامعة وساعة الجواز يغير نظرتة خالص..والشاب لما يلاقى البنت حاجة سهلة فى ايدية ..هينظرلها نظرة احتقار ...ويضيع معها وقت ..وساعة الجد متلقيش حد..وعندة واحدة للمشى وواحدة للجواز.

3-خليكى كويسة:طبعا قبل كل حاجة لازم تبقى على خلق ودين كويس .. علشان الطيور على اشكالها تقع ..يعنى عايزة واحد محترم ..شوفى المحترم بيدور على اية ..هيدور على واحدة محترمة ..والحكم اللى هيحكم بية عليكى هى اللبس ..لان دة اول حاجة الشاب بيشوفة..وبيحكم على البنت منها.. لانة هو الشئ الظاهر منها.

4-كنِ جميلة حيية: جمال المراة فى مظهرها شئ نسبى..يعنى الجمال الخارجى بيختلف من واحد للتانى..وطبعا الازواق بتختلف ودة من فضل ربنا علينا ..فلا تتصنعى الجمال ..فأنتى جميلة فى نظر غيرك ..والحاجة التانية اللى بجد بنفتقدها فى مجتمعنا كتير ..الحياء ..فجمال المراة فى حيائها ...والحياء شعبة من شعب الايمان ...فكُنى حيية فى مظهرك وفى كلامك وف كل شئ فيكى جميل.

انا كنت عايز اخلص الموضوع النهاردة بس الظاهر مفيش نصيب ولسة لنا موضوع كمان علشان ننقشة من جانب الشباب والمجتمع ..هنتقابل فى الجزء الرابع ان شاء الله ..

اريد جوززا...الجزء التانى

ورجعنا ليكم من جديد
بعد طوووووول انتظار..وطبعا نأسف للتأخير
نكمل الموضوع اللى بداناة المرة اللى فاتت ..عن الجواز وسنينة

احانا بصراحة شوفنا البنات كانوا بياخدوا بالاسباب ....علشان يتجوزو
هى اى اسباب مبتجبش حتى قطة ...للجواز ..بس هنعديها

طيب الشاب بقى ...يعمل اية علشان يتجوز
الشاب علشان يتجوز...هيدور على عروسة..امال يعنى هيدور على فرخة

كانت قبل كدة البنت لما تتولد ..تقوم واحدة عندها عيل صغير..تقولك البنت دى لمحمد ابنى
يعنى بتحجزلة عروسة ...وهو لسة فى اللفة..دة طبعا كان زمان
الوقتى طبعا بقى العكس....البنت هى اللى بيحجزلها عريس من صغرها

الواد لما يكبر برضة مبيتعتقش..يعنى انا مرة كنت جايب دعوة فرح واحد..لناس جيرانا
فانا بعطى الدعوة لبنتها ..ولسوء الحظ..بنتها دى قدى
فلقيت امها ...طالعة علشان تقولى عقبالك..انا قومت عامل فتك..وقلتلها عقبال بنتك ياحاجة
وقمت جاية ردة بسرعة..انت وهى فى يوم واحد ياحبيبى
بصراحة انا سكت..وخدت ديلى فى سنانى وجرررررررررريت

يعنى من الاخر ...هتتجوز هتتجوز ياحبيبى...مفيش مفيص
ومن يوميها معتش بوزع دعاوى الحمد لله

طيب نعمل اية ياجدعان ...تخلع من عروسة تلاقى التانية..من جميع الجهات

الشاب بقى على قد حالة ..عارف البير وغطاة..وعارف انة عاوزلة كام سنة على مايتجوز
فى الاسعار اللى تخلى شعر الواحد يشيط...والمهور والبلاوى

فبيقعد يقرف فى نفسة وخلاص...ونظام عيش حياتك...لغاية متعرف تتجوز
يعنى لقيتلك بنت..تمشى معاها فى الجامعة ...ولا هنا ولا هناك...امشى ..وحب ...واعمل اللى انت عوزة
وساعة الجواز ...شوفلك واحد قريبتك علشان تبقى ضمنها ...علشان تتجوزها
دة فكر معظم الشباب

طيب واللى المحترمين من الشباب بقى ..واللى يقولك حرام تظلم بنت معاك ..وانت مش هتتجوزها
دة بيقعد يهرى فى روحة وخلاص...يعنى يقعد مع اصحابة
ياجماعة احنا عايزين نتجوز....البلوزات فى الطالع ..والبناطيل فى النازل
والواحد تعباااااااااااان ..من الحاجات دى....عايز اتجوز
دة اللى بيتكلموا بس...

دا حتى فى واحد صاحبى ..كل مايشوفنى يقولى عايز اتجوز
مرة كنت بصلى الجمعة..اول مال الخطيب نزل..من على المنبر..لقيتة بيقولى
بقولك اية...قولتلة اية...قالى ..انا عايز
رديت علية وقولتلة ...وانا كمان

لغاية دلوقتى وصلنا لكذا حاجة
البنات عايزة تتجوز...والشباب عايز يتجوز...والامهات عايزة تجوز بناتها

لسة موصلناش ..مشكلة الجواز..والعنوسة جاية منين
احنا قولنا كل حاجة فى الجواز حلوة
فى المرة الجاية ....هنقول المشاكل اللى بتواجة الجواز..وازاى نحلها
مع بعض........علشا نشوف زتونة الموضوع

واشوفكم على خير

عايزين نتجوزز..الجزء الاول

الجواز وسنينة

كان قبل كدة فى قديم الزمان يعنى ..الجواز ة حاجة عادية ..مكانش حد بتيكلم فية
لانة مش أمر اللى عايز يتجوز يروح يتجوز..وكان الواحد يلزق فى دماغة انة يتجوز يدوبك اسبوع ويكون متجوز
مش يعني علينا احنا النهاردة..الواحد يفكر يتجوز من ساعة ماينزل من بطن امة
علشان يدويك يتجوز على سن 30 سنة
بقى الجواز الناس كلها بتتكلم فية ...وبقت مشكلة الجواز ..موجودة فى كل بيت

الناس لغاية دلوقتى مش عارفين اسبابة اية ..بس هما بيحاولوا يعروفا الحمد لله
يعنى السبب الشباب ..ولا البنات ..ولا الحموات ....ولا الحكومة.ولا اية بالظبط

احنا الموضوع دة هنقسمة على كذا جزء..ونفصل الموضوع



الجزء الاول :عريس يابوى اقتلة بس متموتوش

بقى نظام معظم البنات الوقتى ..وهدفهم السامى اللى معظم البنات بيفكر فية...كيف توقعى عريسا

طبعا فى كذا طريقة للمواضيع دى ..الظاهر بياخدوا قرصات فى كدة
الطريقة الاولى
كيف توقعين شابا بأن يكون عريسا لكى؟؟
اول حاجة تتعرفى على واد حلو كدة ومقطقط...وياسلام بقى لو شكل مهند..ولا هانى سلامة
انتى بقى وشطارتك..وياسلام بقى لو عندة عربية وطقم صوت
ومتريش كدة ..هو انا لسة مفهمتش يعنى اية متريش..بس اعتقد انها
يأما على راسة ريشة ..او هتدورلها على فرخة..ولا اقولك ديك احسن
ودة طبعا فى الجامعة او فى ابن الجيران او اى حد بتاع توك او غيرة
ودة فى الاخر بيطلع على فشوش

بس هى طبعا مش ساكتة ..برضة حاطة احتياطات ونظم تانية
الطريقة التانية
وجع الرجلين
كل يوم على الله تلاقى البنت من دول واخد امها وماشين على فين
قلبين البلد راس على عقب ..ومحدش يسألنى على الكلمة اللى فاتت دى
بس المهم واخدين البلد كعب داير ..جايز واحد يقابها فى الطريق يعجب بيها ولا حاجة
وامها يعينى اللى مظلومة معاها فى الموضوع دة

الطريق التالتة
الافراح
اتضح ان نسبة النساء فى الافراح اضعاف مضاعفة عن نسبة الرجالة
واثبتت الدراسات حاجات كتير فى الموضوع دة
1- ان فى ناس مش مدعين فى الفرح بيجوا غتاتة يعنى
2-ان كل واحدة جايبة قرايبها وقرايب قرايبها وقرايب قرايب قرايبها ..وهكذا
وتلاقى الكل طالع على المسرح ...بيقولوا انهم بيسلموا على العروسة
بس دول بيسلموا على العروسة مرة واتنين وتلاتة
وبالذات بقى لو الكاميرا مجتش عاليهم ..يطلعوا ويتفقوا مع الراجل بتاع الكاميرا انة يجبهم طول الشؤيط
العروسة مبتطلع فى الكايرا الا قليل جدا ..ماخلاص هى اتجوزت الدور ولاباقى على الباقين

__________أقتباس مدونة عايزة اتجوز__________

وياسلام لو واحد معدى كدة ..فى أمانة الله..يلاقى اللى تنادى علية
خد ياد ياتامر...مش تيجى تسلم على بنات خلاتك
الواد يبص كدة باستغراب ويقولها اولا انا مسميش تامر
وانتى شكلك مش خالتى واول مرة اشوفك
ترد علية وتقولة ...معلش يابنى العتب على النظر
بس متعرفناش بيك ..يمكن يبقى ليك نصيب معانا ولا حاجة
وساعتها بيحصل حاجة من اتنين ..يأما الواد بيطلع يجرى ..يأما واحد صاحبة بينادى علية
_________________________________
وخد كتير من كدة

البنات عايزة تتجوز ليهم حق
وكمان الشباب عايز يتجوز برضة ليهم حق
طيب دى بعض الحاجات اللى البنات بيعملوها علان يتجوزا
هنشوف بقى الشباب بيعملوا اية
فى الجزء التانى
واحنا مع بعض لغاية مانشوف حل للموضوع دة

الانسان اصلة ورقة

اختلف العلماء والجهلاء واللى مبيفهموش حاجة على اصل الانسان...ومفيش حد رسى على حاجة واحدة
واحد قالك ان الانسان اصلة قرد..ودة حاجة ترجعلة ..كل واحد حر اصلة قرد اصلة معزة ملناش احنا دعوة
وواحد قال ان الانسان أصلة جلدة حنفية ...عادى برضة جلدة جلدة...كل واحد حر
احنا فى عصر الحريات ...عصر البتنجان والطاطس..ورغيف العيش

كل دة لحد ما ظهر العالم الجليل المحترم المبجل اللى هو انا طبعا...(من غير فشخرة طبعا)
الى الوصول الى هذة الطفرة اللى هتغير العالم...الاكتشاف الرهيب بتاعى إن

===الانسان اصلة ورقة===

وطبعا الكلام دة مش كلام وبس ..دة كلام بأدلة وبراهين ..وبعد علم وافى..ودراسة ملهاش حل
دراسة دامت حوالى 5 دقائق بحالهم ....طبعا انتم حاسين مدى المعاناة..اللى انا عانتها ..فى اكتشاف الموضوع
المهم...بقى ندخل فى الموضوع..يالا ادخلوا برجليكم اليمين

الدليل الاول
طبعا انت دلوقتى عارف ان انت لو جتلى وقولتلى ان انت عايش..فى الحياة ..مصدقكش ..
الا لو لقيت معاك...شهادة ميلاد..او اثبات وجود فى المجتمع زى البطاقة...
يعنى انت لو طلعتلك شهادة وفاة ...وانت عايش...اصدقك ..ولا اصدق الورقة
طبعا اصدق الورقة ...يبقى انت بقيت مجرد ورقة

الدليل الثانى
انت لو اخدت كلية والشهادة بتاعتك اتحرقت ..انت ليك لزمة...ولا ليك اى لزمة
حتى لو عملت عمل وعلقتة فى رجل جمل
او حتى احسن واحد تعرف اى حاجة فى اى مجال...بدل معاكش ورقة تثبت انك بنعرف ..ملكش لزمة برضة

الدليل الثالث
اعمل اى حاجة من غير ورق ..يبقى ملكش لزمة...مينفعش تتجوز من غير ورق
مينفعش تطلق من غير ورق...مينفعش تتلكم من غير ورق..مينفعش مينفعش

كفاية كدة ادلة وبراهين...يبقى هنوصل للأستنتاج النهائى
أن انت ورقة

كما قال فيكارت"انا ورقة اذن انا موجود"

وطبعا اول من شجع الموضوع دة فؤاد المهندس الله يرحمة..لما طلع على البرج وقعد يقول
انا ورقة ..انا ورقة ...ودة طبعا قبل الاثباتات اللى انا عاملها

وطبعا انتم عارفين المثل المعروف اللى محدش يعرفة
"لو لم اكن ورقة لوددت ان اكون كشكولا"

يالا ياورقة منك لة ....لو شوفت اى ورقة هنا ولا هنا شيلها
ومستنين ورقكم

مفيش فايدة ياعرب

حاجة غريبة جدا جدا.. تيجى تبص يحصل تفجيرات فى اى حتة ...فى العالم العربى او غيرة
كل واحد متضايق من واحد يطلع ويقول اسم اللى متضايق منة ...وهيصة
كل واحد يطلع يقول الجماعات الاسلامية ..ومش عارف اية...انا مش عارف اية اللى بيحصل دة والله
المشكلة بقى ان امريكا تقول الحاجة ..احنا نكرر وراها ..زى الهطل كدة
يعنى المسلمين ارهابين ...احنا نطلع ونقول اللى يعتبروا بيمثلوا الدين ارهابين
يعنى لو افترضنا ان واحد يقولك انت حمار..تمشى فى الشارع وفرحان اوى ...انا حمار..انا حمار
اهو احنا بنعمل كدة...احنا ارهابين احنا ارهابين..وفارحانين اوى

عمرنا ماسمعنا...ان فى واحد طلع وقال اللى عمل حاجة زى دى يهود مثلا
اصل اليهود بيحبونا ..وعمرهم مايعملوا كدة فينا..اما المسلمين فهما بيكرهونا
دة باى معنى واى منطق...ياناس بجد حرام عليكم
مع ان اليهود دى صفاتهم على مر التاريخ..مش حاجة جديدة عليهم

الا مسمعتش يوم واحد طلع وقال ال1500 اللى استشهدوا فى غزة فى الحرب الاخيرة
من المدنين ان دة ارهاب...مفيش واحد طلع وقال كلمة واحدة من دى
لية القنابل المحرمة دوليا..اللى استخدمت فى الحرب على المدنين ..لية مسموش ارهاب؟؟
هل الارهاب كلمة قالها اليهود واعدأنا على المسلمين ..احنا نردد وراهم وخلاص..حاجة بجد
انا بجد مش عارف اقول اية ولا اية ..الكلام كتييير

حاجة تانية ...سمعنا من شوية ان اليهود الصهاينة الكفرة سبو سيدنا وحبيبنا محمد صلى الله علية وسلم
وسبوا سيدنا عيسى علية السلام...واتهموا السيدة مريم العذراء بالزنا
هؤلاء هم اليهود طول عمرهم ...ليس لهم ملة وليس لهم دين وليس لهم عرف
انا لا الومهم قبل ان اللوم انفسنا...فاحنا اللى خليناهم يعملوا كدة
لانهم شايفين اننا هان علينا الدين...فلم يحترموهم هم...فاللوم ليس عليهم
فاذا لم نعتز بديننا...ولم نطبق سنة نبينا...واتجهنا اللى فكرهم وعقائدتهم
اخذنا فكرهم فى كل شئ صغير وكبير...وقلدناهم تقليد اعمى
فنحن الذى قال فيهم نبينا رسول الله صلى الله علية وسلم"...حتى اذا دخوا حجر ضب خرب دخلتموة"
ياجماعة بجد حرام عليكم ..هنبقى كدة لأمتى...هنبقى كدة فى قاع الامم لأمتة
فالامم لاترتقى الااذا كان عندها عقيدة متمسكة بها ...وفكر خاص بها
واحنا عندنا الاسلام...فلماذا لانأخذة ونتمسك بة ..فهم يتمسكون بباطل..ونحن لدينا الحق
فلماذا لانتمسك به...ونبينة للناس...ونقول للناس بصوت عالى ...هذا هو دينى ..هذة هى عقيدتى
هذا هو رسولى وحبيبى ونبى

لية لغاية دلوقتى مقتنعين ان حرب اليهود على فلسطين حرب سياسية ..او حرب على الارض
بل انها حرب على الاسلام ...هى حرب دينية...عقائدية
وانا لله وانا له لراجعون

الحلقة الثالثة:هابى فلان طيبن

واحد:هابى فلان طين
انا:وانت بالصحة والسلامة
نفس الواحد:هابى فلان طين
انا:ممكن تلاقية فى الصيدلية اللى جنبنا
برضة نفس الواحد:ياعم هابى فلان طين
انا برضة:ياعم مش عندى منة..وانا اعملك اية يعنى...اية وجع الدماغ دة

دة حوار كان بينى وبين واحد...مش عارف اية ياجدع اللى طالع على الناس دة...كل ما امشى فى الشارع..الاقى واحد يقولى
هابى فلان طيبن...ابص فى كل حتة...الاقى هابى فلان طين...اية ياجماعة فى اية...انا افتكرتها..فى الاول..
ترجمة مرجان بيحب جيهان...واحد معقد كاتبه ولا حاجة...لا ومش بس كدة
الدنيا حمراااااااااااااااااا...احمر منها مشفتش...والناس حمراااااااااااااااااااا...وتلاقى واد محمر ماشى مع بنت محمرة
على اساس انى بحمر شيبسى...حتى انا فاكرتة اعتصام لناس اللى بيخطفوك...علشان تتبرع بالدم...
تلاقى الواحد واقف جنب عربية التبرع بالدم...ياباشا اتبرع معانا بالدم...لاوالله لسة متبرع قريب
بس التبرع مفيد ياباشا...والله ياباشا انا معدش عندى..غير ليترين ماشى بيهم...وهما اللى هيروحونى
يقولك اتبرع بواحد وروح بواحد...على اساس انها خيارة...هديلة واحدة وانا واحدة
ميسكوتش خالص الا لما تجيبلة كل الامراض اللى فى الدنيا...تقول انا عند السكر وفيرس سى..الخ
علشان يقتنع بقى

نرجع لموضوعنا...انا طبعا قولت لازم اعرف اية الموضوع الحمار(بفتح الحاء..ودماغك متروحش لبعيد) اللى ماشى فى البلد دة
لقيت اخ احمر ماشى مع اخت حمرا..وقفتهم وقولتلهم...هو حضرتك لابسين احمر لية النهاردة
لقيتة بيبوصلى...باستغراب كدة..ويوقلى ...ياراجل مش عارف...لا مش عارف الصراحة..عاملين اضراب ولا حاجة؟؟
حكاية الاضرابات اللى شغالة اليويمن دول...لقيتة بيقولى..النهاردة الفلانطين..عيد الحب....
بصيتلة جامد اوى كدة..وقولتلة...ومبسوط اوى

انا قولت لازم بقى الواحد يبقى عندة خلفية حضارية عن الموضوع ة...ميبقاش ماشى كدة
روحت اشوف يعنى اية فلانتين...وسموة كدة لية..قريت يجى 3689قصة مختلفة عن بعضها
بس اللى مؤكدة فيها حاجة واحدة بس...انة هو واحد كان بيجوز ناس ...فى وقت الحكومة كانت بتسحل الشباب على الجيش
وكانوا ممنوعين من الجواز...كان الحاج فلانطين دة...ياخد الواد والبنت كدة...ويجوزهم من ورا الحكومة
وياويلة بقى اللى يعمل حاجة من ورا الحكومة....يويللللللللللللللللللللة..وياعذاب ليلة
المهم الراجل دة عرفوة واخدوة وخوذقوة...يوم 14 فبراير
واختلف العلماء...بأنة اكن قسيس او كان اسيس..او كان رجل عادى..او كان اية بالظبط
المهم انهم اتفقوا على الخازوق

بقا بزمتكم كدة ...واحد اتخوزق...وكرامتة اتبعترت...نحتفل بية...ياراجل بلا كلام فاضى
وكل واحد ماسكلى دبدوب...قدة..وماشى ..رايح فين ياعم...رايح الفلانطين

وفى الاخر بقولكم ...هابى مصطفى داى...دا اليوم بتاعى دى
وهنعملة يوم 20 فبراير 2009 احنا خلاص هنغيرة...وهيبقى دة
بس فية فرق انا مش بجوز حد من ورا الحكومة...ولا انا اعدمت...انا لسة حى وكويس
وهنعملهولكوا اجازة...بس لو بقى اجازة صحيح...انتوا هتقبلوا فى الجامعة ازاى...خلاص مش هنعملة اجازة
هنعملة دراسة ومحدش يحضر...كلة يسكشن برة...والمراد بالسكشنة فى الجملة ..هو....بقولكوااية
هقولهالكوا فى الحلقة الجاية...علشان نوضحة اكترررررر
الى اللقاء

الحلقة الثانية..شباب تعبان اوى

شباب تعبان اى والله الشباب مش عارف اية اللى حصلة اليومين دول...الواحد من الشباب تلاقية ماشى مش قادر يصلب طولة الله اعلم من اية..ومش هنفسر اكتر من كدة

تلاقى الواحد من دول ماشى لابس قميص...عاى يعنى..بس قميص اية....مفهوش ولا زرار مقفول مش عارف وماشى مبينلى ...شعر صدرة..وقاعد يغنى...شعر صدرى بخير ...شعر صدرى طويل وفاكر نفسة جابر حسنى...المشكلة انة ماشى فرحان اوى بنفسة

ويعينى بقى على البنطلون الساقط دة...مع العلم البنطلون..واسع يعنى مش زى البنات...قاعدوا يشدوا لغاية ما.هقوا...لا دا واسع جاهز...بس يمكن علشان...انة واسع..فبيسقط ولا حاجة والحزام مش ماسك كويس...ولا حاجة...المهم يبقى ساقط لنص رجلة.. دا غير بقى شكل البنطول...الموضة الوقتى...يأما بنطلون مقطع...يأما مرقع..يأما مزيت يأما مليان جيوب...والفاضى خالص ودة اللى بيلبسة المحترمين...البنطلون الديرتى(القذر يعنى) ودة اصلا الموجود فى السوق...يعنى مش هتلاقى بنطلون عدل خالص

طيب بالنسبة للِمقطع..واحد زيى فاهم المقطع انة موضة..واحد غيرى يفتكر انة غلبان طيب انا هكيلكم قصة وتقعية حصلت ...واحد راكب المكروباص...ولابس بنطون مقطع..وقميص منسل وقاعد جنبة راجل كبير...المهم...جة وقت الحساب...فالشاب جة يطلع فلوس...الرجل اللى قاعد جنبة قالة لا والله...مانت دافع..انا اللى هحسبلك..يارجل يهديك يرضيك..مفيش فايدة ... اتارى الراجل فاكرة غلبان..ومش عارف حتى يخيط البنطون بتاعة..ولابسة كدة وذاهب لطلب العلم...فحب يساعدة بكدة
والدروس المستفادة من هذة القصة انك يوم اللى ميبقاش معاك فلوس...هات بنطلون مقطع... واقعد جنب..راجل كبير كدة ...علشان يحسبلك

لا والشعر بقى ...طويل....وطالع لفوق..عامل زى اريال...تقولة دا اية دة يابنى يقولك..دا بيجيب الاف ام...علشان يشغل برنامج...انا والنجوم وهواك مباشر على دماغة... عقبال مايركبولك...دش ...وتجيب البيت بيتك

طيب سيبك من شكلهم..وتعالى نشوف فكرهم...فكرة اية يابا..ياحسرة عليها ياحسرة عليها
استخدام نظام" هيس هيس...علشان تبقى شاب كويس" بقى كل واحد ماشى مفيش فى دماغة غير خمس حاجات بنات وبنات وبنات واغانى واغانى انا مش عارف والله اية الحكاية دى...ولما تلاقى اتنين قاعدو مع بعض شوفت البنت مش عارف اية...والبوم عمرودياب الجديدة امتى..هما دول الحاجتين اللى بيتكلموا فيهم

على راى المثل "الشاب لو راح الجماعة يجب لاهلة الموزة" والله انا لو قعدت اتكلم عن كل حاجة...يبقى عايزلى كتب...بس هتعمل اية بنات كدة وشباب كدة..احنا بجد هنصحى امتى مش عارف

الحتة اللى فوق دى حتة دراما كدة...لزوم الشئ يعنى
وانتظرونا مع الفلان طين داى الاسبوع الجاى

الحلقة الاولى..نسوان ورا نسوان

الحلقة الاولى
نسوان ورا نسوان
والله انا مكنتش عارف أبدأ معاكوا ...بأنهى موضوع...بس الصراحة قلت أبدأ معاكوا عن البنات...نتسلى عليهم شوية
طبعا من غير ماحد يزعل...واللى عندة اعتراض يتكلم...لان احنا هنقول اللى موجود فى حياتنا بالظبط

طبعا احنا الرجالة المفروض علينا ان احنا نغض بصرنا...يعنى كل واحد مننا..يلم عينة ..ويمشى من سكات
دا طبعا ...دونا عن انى دة يعاكس او يتحرش او اى حاجة من دى

انا بقى قولت خلاص الواحد لازم يلتزم ويلم نفسة شوية...نزلت الشارع وقولت أبص قدامى لقيت واحدة..امت جاى باصص جنبى على اليمين لقيت واحدة تانية...بصيت على الشمال واحدة تالتة...لفيت وشى وراجع للخلف لقيت عشر وحدات
قولت مبدهاش بقى...ابص فى الارض واللى يتخبط بقى مليش دعوة بية
بصيت فى الارض...مشفتش واحدة...بس شوفت كوارع ماشية...ياجماعة حد يشيل الكوارع دى مفيش فايدة
جيت ارفع راسى لفوق وقول "يارب خدهم وريحنا"..لقيت واحدة وقفة فى البلكونة

يعنى من الاخر انت محاصر ...يعنى محاصر
الحل الوحيد فى الموضوع دة...ان انت تقفل عينك...وتمشى ...وهات عيل صغير يشدك

المشكلة بقى ان مش دى المشكلة...انت لو فى واحدة ماشية قدامك باحترامها...ولابسة لبس محترم هتقول ماشى
مش هتركز فيها...وهتمشى بأحترام
اما لما تلاقى واحدة لابسة بنطلون ياجدع...مش عارف والله مدخلاة ازاى ...اعتقد انهم بيستعملوا الصابون علشان يدخولة
دا طبعا..غير الاستعانة بصديق بقى وبالجيران...وخدى يا ام فاروق شدى معانا...
بس بجد هما بيتعبوا جامد...دا دة بس علشان يلبسوا البنطون...دا غير طبعا الحاجات التانية
الباضى ..وغيرة..لا واية البناطيل فى النازل ..والباديهات فى الطالع
طيب البناطيل فى النازل وعرفنا لية..جايز تكون تعبت من تطليع البنطلون...فبتوقفة لغاية حد معين
طيب الباديهات فى الطالع لبة...هو انا استنتجت استنتاج..بس مش عارف هو صح ولا غلط
ان يمكن عندهم ازمة اقتصادية زى بتاعة امريكا كدة...فبتلبس لبسها القديم

لا وكمان...دا غير المكياج اللى هى بتحطة...لو هى رايحة الجامعة مثلا..وعندها محاضرة الساعة 12 الصبح
تصحى من الساعة 5 ..تصلى الفجر وتبتدى...تقعد تحط مكياج...على اقل تقدير 4 ساعات
دا يوم لما تبقى مكروتة فى شغلها...وربنا يستر بقى لما تشتغل بأتقان
واحنا طبعا مش هنتكلم عن التصليح اللى بيحصل فى الحممات وكدة

داغير بقى البتاع اللى بيلبسوة فى رجليهم...بيمسمروا فية مسمار وينسوة طالع ويمشوا بية فى الشارع
ولو سألت واحدة اية دة ..تقولك دة كعب...وانا اللى فاكرة مسمار
والله بيبقوا صعبانين عليا...لما يبقوا ماشيين بية...انا نفسى بتعبلها سلف
والله الجماعة دول بيتعبوا جامد...والمشكلة انهم بيتعبونا معاهم...

دا بالنسبة لو البنت لبست بنطلون...طيب لو بتلبس جيبة بقى
بعد التعب اللى بتشوفة فى البناطيل...تلبس جيبات..وخلاص
وتلاقى الجيبة بتطور "التطوير الطبيعى للحاجة الساقعة"
الجيبة اول ماتتلبس ..تلاقيها طويلة كدة ...ومحترمة وزى الفل
شوية شوية تلاقي الجيبة قصرت...وبقت حالتها حالة ...بس لابسة تحتها بوووووووووووووووت
الواحد يقول خلاص ماشى ياعم مفيش مشكلة بدل فى بوت
فجأة ...تلافى البوت اتقلع...تقول مش مشكلة حتة صغيرة من الرجلين مفيش مشكلة
بعد شوية تلافى الجيبة طلعت كمان شوية...وتحتها بتاع كدة لسة معرفتش اسمة لغاية دلوقتى
بس مسيرى اعرفة...المهم البتاع دة اتشال خلاص
والجيبة لسة زى ما هية...
بس كدة الموضوع طول..قصدى كبر

دى اخر تتطور للحاجة الساقعة...قصدى للجيبات..مش عارف بقى هيوصلوا بعد كدة لأية
اللى يضيقك بقى ..انهم رجليهم مش حلوة علشان قاعدين فرحانين بيها كدة

المهم فى الأخر...طبعا معندناش حد بيزعل..واللى عندة راى مخالف يقول
والمرة الجاية هنتسلى على الشباب شوية